Gazetari Dritan Laçi tha në një intervistë për Euronews Albania se vrasja e biznesmenit Ardian Nikulaj është mbuluar me kakofoni fotosh e videosh nga grupi hetimor që nga fillim.
Laçi tregoi se vetëm disa ditë pas ngjarjes, në telefonat e gazetarëve të kronikës qarkulluan foto të shtetasve anglezë, gjë që sipas tij të bën të dyshosh se kemi të bëjmë me përdorim të qëllimshëm.
Sipas tij, dalja nga ana e policisë me pistën e gjakmarrjes është e shpejtuar pasi nuk mund të përjashtohen pista të tjera kur hetimi nuk është shteruar.
“Nuk mund të them se nuk janë këta njerëzit që e kryen vrasjen e Nikulajt, por të dalësh direkt tek pista e gjakmarrjes ndërkohë që s’e ke shteruar hetimin…
Lezha është një zonë shumë e nxehtë, ka shumë bosë lokale, ka shumë interesa, trafiku i drogës, politika.
Duhet të ishte shteruar më shumë si hetim përpara se të dilej në konkluzion që kjo është bërë për hakmarrje.
Pse të mos marrim pistën se mund të jetë përdorur gjakmarrja nga një grup tjetër interesi për të eliminuar Nikulajn dhe për të fshehur gjurmët?” tha gazetari.
