Los Angeles Lakers bind, James dhe Davis mposhtin Warriors në “Chase Center”

Spektakli në NBA po vijon edhe në ndeshjet gjysmëfinale të dyja konferencat. Los Angeles Lakers fitoi 117-112 gjysmëfinalen e parë play off ndaj Golden State në Perëndim, në fushën e këtij të fundit, duke udhëhequr 1-0 serinë e takimeve.

Një ndeshje e ekuilibruar dhe e hapur deri në fund, ku për miqtë 5 lojtarë realizuan mbi 19 pikë. Diferencën e bëri Anthony Davis, autor i 30 pikëve e 23 rebound, ndërsa LeBron James e mbylli me 22 pikë e 11 rebound. Në kahun tjetër, Curry realizoi 27 pikë, Thompson 25 e Poole 21 pikë, por që s’mjaftuan për të evituar humbjen e kampionëve në fuqi.

Në Konferencën e Lindjes, ekuilibër pas dy ndeshjeve të para mes New York e Miami Heat. Njujorkezët fituan 111-105 ndaj rivalëve nga Florida në shtëpinë e tyre, duke barazuar 1-1 serinë. Brunson me 30 pikë ishte më i miri në fushë për New York, mbështetur edhe nga Randle me 25 pikë e Barrett me 24 pikë. Te Miami u ndje mungesa e Butler.