Partizani ka triumfuar 3-1 ndaj Kukësit me përmbysje, në sfidën e vlefshme për elitën, duke shkurtuar diferencat me kreun në dy pikë. Verlindorët fituan penallti në minutën e nëntë pas prekjes me dorë te Menish. Nga pika e bardhë nuk gaboi Gjelbrim Taipi, i cili dërgoi topin pas shpinës së Rexhepit.
VAR ishte protagonist në këtë sfidë në minutën e 22-të. Teknologjia më e fundit në futbollit e konsideroi jo të rregullt ndërhyerjen e Ndrecës ndaj Rrapajt në një duel në zonë për topin, duke u akorduar kështu më pas 11-metërsh për të kuqtë. Ekzekutim perfekt i Da Silvas, me një gjuajtje të bukur.
Brenda pjesës së parë kryeqytetasit do përmbysnin shifrat me golin e Atanaskoski, në minutën e 28-të.
Da Silva nderoi sërish skuadrën e Colellas, sulmuesi thelloi rezultatin në fillimin e pjesës së dytë. Pjesa e mbetur shërbeu për mbrojtjen e rezultatit, me vendasit që siguruan 3 pikë jetike në garën për titullin kampion.
Tirana kryesuese është mundur 2-1 në Durrës nga Teuta, duke bërë kështu që ndjekësit e Partizanit të jenë vetëm 2 pikë larg.
Bardheblutë shënuan të parët me Haxhiun, sakaq përmbysja e madhe erdhi pas golave të Emiliano Vilës dhe Lorenco Vilës.
Gara për titullin kampion është ndezur. Skuadra e Shehit ka 59 pikë, ndërkaq Partizani ka 57 pikë.
