Kreu aktual i bashkisë, Erion Veliaj, gjatë takimit me banorët e Baldushkut dhe të Farkës, ka folur për projektet që do të transformojnë kryeqytetin, ku nuk ka munguar dhe sulmi ndaj opozitës dhe kandidatit të koalicionit “Bashkë Fitojmë”, Belind Këlliçi.
Gjatë fjalës së tij ai është shprehur se kush ka munguar për 4 vite, të dielën në 14 maj do të ngelë në klasë, duke iu referuar kështu Këlliçit.
“Në ditët më të vështira skuadra jonë qëndroi këtu, ishte këtu, nuk u largua, nuk mori mungesë. Imagjinoni pak sikur një mësues të mos shkojë 4 vjet në shkollë, ka gjasa të punojë mësues prapë?
Sikur një ushtar të dezertojë dhe ta heqë uniformën e Republikës së Shqipërisë dhe 4 vjet të dezertojë, ka gjasa që ta veshë prapë uniformën? Nëse një infermiere e katundit tonë nuk vjen për të bërë vaksinat, për konsultat e fëmijëve, a ka gjasa ta marrim prapë infermiere?
Por në qoftë se një fëmijë në një shkollë të Farkës, Baldushkut, apo Petrelës nuk paraqitet katër vjet ka gjasa që ta marrë diplomën? Ne e kemi standardin shumë lart për një polic, për një zjarrfikës, për një mjek, për një doktoreshë, për një ushtar, për një oficer, madje edhe për fëmijët, kurse e kemi standardin shumë poshtë për fuksin e lagjes, për Ilir Metën, dhe ish-komunistin Sali Berisha. Ata për 4 vite ishin te Gjiri i Lalzit, nuk e vunë ujin në zjarr fare për hallet tona. Por, kush mungoi 4 vjet, të dielën do të ngelë në klasë”, deklaroi Veliaj.
