Elita e futbollit shqiptar ka dhuruar spektakël në javën e parafundit, teksa Partizani i ka rrëmbyer vendin e parë Tiranës. Tirana nuk shkoi më shumë se një barazim 2-2 në Rrogozhinë ndaj Bylisit.
Bardheblutë zhbllokuan takimin në minutën e 22-të, falë një kundërsulmi vrasës të finalizuar me sukses nga Hila.
Ballshiotët reaguan menjëherë, duke u kundërpërgjigjur me golin e barazimit. Përgjoni bëri një gabim fatal me një top të kthyer keq mbrapa, ndërsa Danladi realizoi një gol fantastik.
Episodi më i rëndësishëm i sfidës i takon minutës së 74-të, kur pas një ndërhyrje të Behiratches ndaj Kaçorrit, arbitri akordoi penallti për skuadrën nga Ballshi dhe u deshën disa minuta për konfirmimin nga VAR. Nga pika e bardhë u tregua i saktë Adili. Skuadra e Shensoit u mbrojt mjaft mirë deri në fund dhe pavarësisht rasteve dhe 10 minutave shtesë, rezultati mbeti 2-2.
Skuadra e Shehit renditet në vendin e dytë dhe mbyll kampionatin ndaj Erzenit në transfertë, me shpresat te ndonjë dështim të rivalëve të qytetit.
Sa i përket takimit të “Elbasan Arenas” mes Kastriotit dhe Partizanit, të parët shënuan krutanët me Grecën, por përmbysja erdhi shumë shpejt me golat e Rrapajt e Da Silvës që në pjesën e parë, ndërsa në fraksionin e dytë shënuan edhe Murataj me Sotën.
