Ish-kryetari i Partisë Demokratike, Lulzim Basha, feston sot ditëlindjen e tij të 49-të.
Basha lindi më 12 qershor të 1974, në Tiranë. Ai ka një karrierë të larmishme politike, ku përgjatë qeverisjes së Sali Berishës, ka mbajtur postin e Ministrin të Punëve Publike, Transportit dhe Telekomunikacionit, ku ai shërbeu për një periudhë prej dy vjetësh, derisa ai u emërua Ministër i Punëve të Jashtme në vitin 2007, post të cilin e mbajti deri në vitin 2009.
Pas zgjedhjeve të vitit 2009 në të cilat Lulzim Basha u zgjodh deputet i Elbasanit, ai u emërua si Ministër i Brendshëm në qeverinë e re Berisha. Në vitin 2011, Basha kandidoi për postin e kryetarit të Bashkisë së Tiranës si kandidat i Partisë Demokratike dhe Koalicionit Aleanca për Qytetarin, duke sfiduar Edi Ramën, kryetarin e atëhershëm të Bashkisë dhe Kryetar i Partisë Socialiste të Shqipërisë. Ndërkohë, mbas dorëheqjes së Kryetarit të Partisë Demokratike Sali Berisha, Lulzim Basha shpalli kandidaturën për kryetar të Partisë Demokratike.
Në zgjedhjet për kryetarin e Partisë Demokratike më 22 korrik 2013, Lulzim Basha fitoi kundrejt kandidatit tjetër Sokol Olldashi duke fituar 80% të votave të anëtarësisë se PD. Postin e kreut të PD-së Basha e mbajti deri në vitin 2022, pas humbjes në zgjedhjet e 6 Marsit. Që prej atij vendimi, Basha u tërhoq nga jeta politike, ku reagimet lidhur me atë çka po ndodhte në vend ishin të pakta.
Ndonëse, kundrejt tij pati një sërë sulmesh nga ish-kryeministri Sali Berisha, me të cilin i prishi marrëdhëniet që në shtator të 2021, ku pas shpalljes “Non Grata” të këtij të fundit, vendosi ta përjashtonte nga Grupi Parlamentar, nuk pati asnjë reagim nga ish-kreu i PD-së.
Ndërkohë, u desh rezultati dëshpërues në zgjedhjet e 14 Majit, i “Koalicioni Bashkë Fitojmë”, të ish-kryeministirt Sali Berisha dhe kreut të Partisë së Lirisë, Ilir Meta, që Basha t’i rikthehej jetës aktive politike dhe të lakmojë sërish postin e kreut të PD-së.
Gjatë javëve të fundit, ish-kreun e PD-së e kemi parë mjaft aktiv, ku përgjatë gjithë ditëve po zhvillon një sërë takimesh me të rinjtë demokratë.
