Në një intervistë të rrallë të tij, pak kohë pasi ka varur këpucët në gozhdë, ylli uellsian i futbollit Gareth Bale, ashtu siç nuk pritej ka folur për të parën herë për raportin me Cristiano Ronaldo.
Për ish-shokun e tij të skuadrës te Real Madrid, në sezonet midis 2013 dhe 2018 ku formuan treshen e ëndrrave me Benzema, Bale shprehet se Ronaldo zemërohej, përplaste këpucët dhe i trembte njerëzit me reagimet e tij pas ndeshjeve ku nuk shënonte gol.
Duke folur në kanalin e YouTube të Martin Borgmeier në turneun e golfit BMW International Open Pro-Am, uellsiani konfirmoi se marrëdhënia e tij me megayllin portugez ka qenë kryesisht pozitive.
“Ai ishte në të vërtetë i mirë, por kishte momentet e tij. Për shembull, nëse ne fitonim me rezultatin 5-0 dhe ai nuk shënonte, ai hynte në dhomën e zhveshjes dhe i përplaste këpucët me zemërim.
Por ai ishte një djalë i mirë, asgjë e keqe në marrëdhënien tonë, ne nuk kishim asnjë problem”, u shpreh uellsiani, i cili njoftoi tërheqjen e tij nga futbolli në janar pas gjashtë muajve te Los Angeles FC.
Bale u pyet nëse Ronaldo e falënderoi ekipin për ndihmën që ata i dhanë për të fituar trofetë individualë dhe disa herëë Topin e Artë.
Fillimisht uellsiani u përgjigj: “Nuk e di… Unë mendoj se ai e bëri, por…“. Me të parë kamerën, Bale drejtoi gishtin nga ajo dhe ndryshoi përgjigjen.
“Po, e bëri”, tha 33-vjeçari duke qeshur.
Në fillim të këtij muaji, Bale bëri bujë teksa përzgjodhi Lionel Messin si lojtarin më të madh që ka fituar Ligën e Kampionëve, me fansat që e konsideruan zgjedhjen e tij si mospërfillje ndaj CR7.
