Franca po vlon nga tensionet dhe trazirat që kanë sjellë protestat e dhunshme që nisën pas vrasjes së një adoleshenti 17-vjeçar nga një efektiv police në Nanterre.
Për të tretën ditë radhazi, dhuna dhe kaosi u dëshmuan në shumë pjesë të Francës, ndërsa protestuesit u panë duke djegur automjete, duke barrikaduar rrugët dhe duke hedhur objekte ndaj policisë.
Pjesa më e madhe e trazirave është përqendruar në Paris dhe në periferi të Nanterës, aty ku ndodhi dhe ngjarja fatale. Në Strasbourg, policia ka përdorur dhe gaz lotësjellës për të shpërndarë turmën.
Më herët presidenti francez Emmanuel Macron në mbledhjen urgjente të qeverisë, njoftoi se 492 ndërtesa u dëmtuan, 2,000 automjete u dogjën dhe 3,880 zjarre u ndezën mbrëmë.
Gjithashtu ai e cilësoi situata aktuale si të papranueshme dhe të pajustifikueshme.
Nga ana tjetër ministri i Brendshme Gérald Darmanin bën me dije se janë arrestuar 875 persona.
