Gjykata e Tiranës ka dënuar me 15 vite burg Fredi Rrushin, i cili akuzohet për vrasjen e biznesmenit nga Tirana, Ruzhdi Hoxha.
Gjykata e Tiranës e ka dënuar me 15 vite burg, por për shkak të vendimit të shkurtuar, Rrushit i ulet 1/3 e dënimit, kështu autori do të vuaj 10 vite burg.
Ndërsa me 1 vit e 6 muaj burg është dënuar Pajtim Rrushi, i cili akuzohet për moskallzim krimi dhe kryerje të veprimeve që pengojnë hetimin.
Biznesmeni nga Tirana Ruzhdi Hoxha u gjet i vdekur më 6 nëntor të vitit 2021 në periferi të kryeqytetit, në zonën e Qafë Mollës në Dajt.
Ruzhdi Hoxha dyshohet se ishte i përfshirë në aktivitete të kundraligjshme me mikun e tij Fredi Rrushi dhe prishja e pazareve mund të ketë sjell vrasjen e tij. Policia gjeti disa sende personale të cilat i përkisnin 43-vjeçarit, dhe më pas duke shtrirë hetimet ka gjetur dhe trupin e pajetë.
Ndaj autorit të dyshuar dhe të arrestuar Fredi Rrushi, për ngjarjen e 6 nëntorit 2021 rëndojnë akuzat e “armëmbajtjes pa leje” dhe e “zhdukjes së provave dhe kufomës”.
Atë kohë dhjetëra efektivë të Policisë së Tiranës ishin organizuar për gjetjen e biznesmenit. Ata kishin marrë informacion dhe nga familja e Hoxhës se si ishte veshur ai ditën që u zhduk. Nisur nga përshkrimi i familjes, efektivët kanë gjetur në zonën e Malit me Gropa një xhup me njolla gjaku që përputhej me atë të Ruzhdi Hoxhës.
Pak metra më tej, në një humnerë është gjetur dhe trupi i pajetë i tij. 43 vjeçari është qëlluar me armë zjarri dhe më pas është hedhur nga shkëmbi. Ruzhdi Hoxha dyshohet se është qëlluar me plumb pas koke.
