Adoleshenti i akuzuar për hakerimin dhe më pas shantazhimin e një sërë kompanish, duke përfshirë Uber, Nvidia dhe zhvilluesin e GTA 6 Rockstar, është një 18-vjeçar shqiptar, i identifikuar si Arion Kurtaj.
Sipas mediave të huaja mësohet se 18-vjeçari ishte pjesë e grupit të hakerëve të Lapsus$, kur publikuan pamjet e video-lojës që është ende në prodhim e sipër, Grand Theft Auto 6.
Por megjithëse shqiptari është duke u gjykuar për 12 vepra penale, duke përfshirë tre akuza për shantazh, dy akuza për mashtrim dhe gjashtë akuza sipas ligjit të keqpërdorimit kompjuterik, ai mund të shpëtojë paq.
Sipas Reuters , adoleshenti hakoi Rockstar dhe dërgoi një mesazh Slack për të gjithë stafin e Rockstar, duke kërcënuar se do të lëshonte kodin burimor.
Reuters thotë se adoleshenti i është nënshtruar ekzaminimeve nga psikiatrit, dhe sipas tyre është i papërshtatshëm për t’u gjykuar. Ndaj një juri do të vendosë vetëm nëse është ai që i ka kryer krimet, dhe jo nëse është apo jo fajtor.
Kurtaj ka pranuar më parë fajësinë për mashtrimin dhe dy vepra penale sipas Ligjit për Keqpërdorimin e Kompjuterit, si dhe për shkeljen e kushteve të lirimit me kusht.
Rrjedhja e madhe Grand Theft Auto 6 e materialeve zhvillimore në vazhdim ndodhi shtatorin e kaluar, duke rrjedhur mbi 90 pamje nga ekrani dhe video.
Në një deklaratë të publikuar kur kompania u kthye në punë, Rockstar pranoi se kishte pësuar një “ndërhyrje në rrjet” , një hakërim nga i cili ishin marrë pamjet e hershme të zhvillimit të GTA 6 dhe pranoi se ishte “jashtëzakonisht i zhgënjyer” nga ajo që kishte ndodhur.
