Organizata Botërore Meteorologjike paralajmëron se vala e të nxehtit që prek Mesdheun pritet të intensifikohet nga mesi i kësaj jave (e mërkurë 19 korrik) dhe ka të ngjarë të vazhdojë edhe muajin e ardhshëm në disa pjesë të Evropës. Afrika e Veriut po regjistron temperatura të larta, parashikohet që temperaturat të shkojnë deri në 50 gradë celsius në Marok.
Tashmë janë vendosur rekorde të reja për stacione specifike të motit në pjesë të Hemisferës Veriore dhe mund të vendosen edhe rekorde të reja kombëtare.
Sardenja e Jugut mund të regjistrojë temperatura prej 46 gradë celsius.
Në Italinë kontinentale parashikohet një temperaturë maksimale prej 43 gradë celsius në jug.
Jugu i Spanjës gjithashtu mund të regjistrojë temperaturat maksimale prej 46 gradë celsius, ndërsa Franca jugore do të arrijë në 40 gradë celsius, sipas parashikimit të fundit.
Ka paralajmërime se temperatura ekstreme mund të regjistrohen në jugperëndim të SHBA-së, ku rekordet e temperaturave mund të thyhen në 38 qytete.
Temperaturat arritën në 116F (46.6 gradë celsius) në Las Vegas, Nevada, të dielën, sipas Shërbimit Kombëtar të Motit dhe mund të arrijnë deri në 113F (45 gradë celsius) këtë javë.
Në Phoenix, Arizona, NWS maksimumi që është shënuar është 46.1 gradë celsius, ndërsa pritet që të shkojnë 47.2 gradë clesius.
