Treguesi i ndjesisë ekonomike për herë të parë pas tetë muajsh ka pësuar rënie.
Sipas statistikave nga Banka Qendrore e Shqipërisë mbi vrojtimin e besimit të bizneseve dhe konsumatorëve, ndjeshmëria ekonomike ra me 6.5% këtë muaj. Megjithatë, niveli i treguesit prej 112.4 vijon të qëndrojë mbi mesataren historike të tij prej 12.4%.
Kjo rënie u ndikua nga dobësimi u besimit në të gjithë sektorët ekonomike, përveç sektorit të tregtisë, i cili shënoi rritje.
Për sa i përket treguesit të besimit nga ana e bizneseve, vlera e indeksit për të gjithë sektorët qëndroi mbi nivelet mesatare historike përkatëse. Nga ana tjetër, për konsumatorët, treguesi këtë muaj pësoi rënie duke e rikthyer atë në nivelin e mesatares historike.
Treguesi i besimit në industri (TBI) u zvogëlua 4.4% .
Gjithashtu, treguesi i besimit në ndërtim (TBN) shënoi një kthesë rënëse me 12.1%, duke ndërprerë trendin rritës që shënoi në muajin shkurt, por duke vijuar gjithmonë qëndresën mbi mesataren historike. Rënia u ndikua nga vlerësimi i ulët dhe jo optimist i aktiviteteve aktuale ndërtuese.
Treguesi i besimit në shërbime (TBSH) ra për të dytin muaj rresht, me 10.4% duke qëndruar gjithmonë mbi mesataren afatgjatë prej 16.4%. Rënia përcaktohet nga vlerësimet më pak optimiste të bizneseve për ecurinë aktuale të këtij sektori.
Treguesi i besimit në tregti (TBT) ishte i vetmi që shënoi rritje këtë muaj, me vlerën 1.6% duke shkuar 15.6% mbi mesataren historike. Ndryshe nga treguesit e tjerë, rritja u përcaktua nga vlerësimi optimist i ecurisë së bizneseve aktuale
Për sa i përket treguesit të besimit nga ana e konsumatorëve, studimi vlerësoi se ai ra me 1.9%, duke ju rikthyer nivelit të mesatares historike.
