Policia ka bërë të mundur identifikimin dhe ka ndarë detaje në lidhje me vajzën që u gjet e pajetë ditën e sotme poshtë urës së Dajlanit në Durrës.
Blutë njoftojnë se ajo është shtetësja me inicialet L.P., 32 vjeçe.
Dyshohet se ajo ka humbur jetën për shkak të dëmtimeve të marra në trup, nga një mjet prerës.
Policia deklaron se janë shoqëruar 17 shtetas të cilët dyshohet se kanë dijeni për këtë rast.
“Në lidhje me një informacion të dhënë paraditën e sotme, se rreth orës 10:35, në lagjen nr.13, Durrës, poshtë urës së Dajlanit, ishte gjetur pa shenja jete, një shtetase, ju informojmë se:
Nga verifikimet e kryera u bë i mundur identifikimi i kësaj shtetaseje, konkretisht u gjet e pajetë shtetasja L. P., 32 vjeçe, banuese në Sukth, Durrës.
Si rezultat i veprimeve hetimore të kryera paraprakisht nga grupi i posaçëm i ngritur për zbardhjen e kësaj ngjarjeje dhe nga ekspertët e mjekësisë ligjore, si dhe nga këqyrja e trupit të pajetë të 32-vjeçares, dyshohet se kjo shtetase e ka humbur jetën për shkak të dëmtimeve të marra në trup, nga një mjet prerës.
Deri më tani, në ambientet e Policisë së Durrësit, janë shoqëruar 17 shtetas të cilët dyshohet se kanë dijeni për këtë rast.
Grupi hetimor vijon hetimet e thelluara për të dokumentuar plotësisht rrethanat e këtij rasti, si dhe për të përcaktuar autorësinë e tij.”-thuhet në njoftimin e policisë.
