Policia e Kosovës ka informuar se që nga data 29 korrik 2023 e deri sot në rajonin e Prishtinës janë sekuestruar pesë armë zjarri, të cilat dyshohet të jenë përdorur në ahengje familjare.
Sipas Policisë, pas përfundimit të procedurave dhe konsultimit me prokurorin e shtetit ndaj të dyshuarve janë inicuar raste për veprat penale “Përdorim i armës dhe mjetit të rrezikshëm” dhe “Mbajtje në pronësi, kontroll ose posedim të paautorizuar të armëve”.
“Policia e Rajonit të Prishtinës, konform detyrimit ligjor që ka, obligohet që në rastet e tilla të filloj kërkimin për armët e përdorura në rast, të ndaloj kolonat e dasmorëve për t’i kontrolluar ato dhe personat e dyshuar dhe në situata të caktuara të ndërmarrë edhe bastisje në shtëpitë ku dyshohet për raste të tilla.”, ka bërë të ditur PK.
