Nëse bregdeti kishte fluksin më të madh të vizitorëve gjatë verës, edhe muajt në vijim pritet të ketë dyndje turistësh në Alpet Shqiptare apo në parqet e ndryshme nga Veriu në Jug sipas ekspertëve të turizmit.
“Fluksi kryesor i turistëve sidomos atyre të huajve, por edhe shqiptarëve përqendrohen brenda Shqipërisë.”
Parqet arkeologjike apo zonat historike të vendit përballen me fluks vizitorësh gjatë gjithë vitit.
“Duke filluar qysh nga Janari i këtij viti të gjitha qytetet kulturore kanë një rritje të ndjeshme, shpesh herë dhe me 200% të numrit të vizitorëve.”
Kuzhina tradicionale dhe agro-turizmi mbeten ndër pikat më të forta të vendit tonë që tërheqin më shumë turistët nga e gjithë bota.
“Vendet dhe restorantet ku ofrohen ushqime tradicionale janë më të preferuarat dhe ato i ke gjithmonë plot, përshembull në destinacione si Lezha që është on top për gastronominë në Shqipëri.”
Nga ana tjetër ekspertët e turizmit theksojnë se edhe prenotimet përgjatë vijës bregdetare këtë vit janë deri në fund të Tetorit.
“Ky fluks do të vazhdojë dhe përgjatë vjeshtës sepse disa prej këtyre strukturave pritëse që janë përgjithësisht të parapaguara ose all-inclusive janë të prenotuara, hotelet.”
Duke parë bumin turistik që pati vendi ynë veçanërisht gjatë stinës së verës, ekspertët rekomandojnë se duhet të rikthehet vëmendja tek infrastruktura për të ofruar shërbim sa më me standarde tek vizitorët e shumtë./ S.M
