Tre punonjës policie janë pezulluar nga detyra pasi akuzohen për korrupsion.
Mësohet se të pezulluarit janë, inspektorët me iniciale E.SH dhe G.N., me detyrë pranë forcave ‘Shqiponja’ në Vlorë, si dhe K. Ç., me detyrë “Trupë Shërbimi” në Fier.
“Drejtori i Përgjithshëm i Policisë së Shtetit, mbrëmjen e djeshme, ka miratuar propozimin e Drejtorisë së Standardeve Profesionale në Drejtorinë e Përgjithshme të Policisë se Shtetit, për pezullimin e menjëhershëm nga detyra, të 3 punonjësve të Policisë, të dyshuar për korrupsion pasiv.
Janë pezulluar menjëherë nga detyra, punonjësit e Policisë:
-Inspektor E. Sh. dhe Inspektor G. N., me detyrë “Trupë Shërbimi” i Forcës së Posaçme “Shqiponja” të DVP Vlorë, të dyshuar për kryerjen e veprave penale “Shpërdorimi i detyrës”, kryer në bashkëpunim, “Falsifikimi i dokumenteve” dhe “Korrupsioni pasiv i personave që ushtrojnë funksione publike”, kryer në bashkëpunim;
-K. Ç., me detyrë “Trupë Shërbimi” i Sektorit të Trafikut Interurban të DVP Fier, i dyshuar për kryerjen e veprave penale “Korrupsioni pasiv i personave që ushtrojnë funksione publike” dhe “Shpërdorimi i detyrës”.
Punonjësit e Policisë janë arrestuar nga AMP-ja, dhe në bashkëpunim me Prokurorinë, vijojnë hetimet për dokumentimin e plotë të këtyre 2 rasteve”, njofton policia./ S.M
