Deri në orët e mesditës vranësirat e dendura dhe kthjellimet afat-shkurtra do të jenë mbizotëruese në pothuajse gjithë vendin tonë, ku intervalet me diell do të jenë në zonat veriore dhe qendrore ndërsa Jugu i Shqipërisë do të paraqitet me vranësira dhe shira të dobët e lokalë. Ndërsa në pjesën e dytë të ditës do të kemi largim gradulal të shirave duke i zhvendosur vetëm në zonat Juglindore. Gjatë natës kthjellimet do të dominojnë në të gjithë vendin.
Temperaturat e ajrit do të rriten lehtë në mëngjes dhe mesditë duke u luhatur nga 12°C deri në 30°C. Era do të fryjë e lehtë dhe mesatare me shpejtësi 35 km/h nga drejtimi kryesisht Veriperëndimor duke sjellë në brigjet detare dallgëzim 1 – 2 ballë.
Kosova
Do të ketë përmirësim të dukshme të kushteve të motit në republikën e Kosovës ku priten kthjellime dhe rritje graduale e temperaturave të ajrit si pasojë e qarkullimit të masave ajrore më të ngrohta me origjinë perëndimore. Por orët e pasdites do të sjellin kalim të vranësirave të lehta nëpër të gjithë vendin, megjithatë nuk priten reshje. Kjo situatë e qëndrueshme meteorologjike do të vijojë në mbrëmje dhe gjatë natës.
Maqedonia e Veriut
Republika e MV do të dominohet nga kushte të qëndrueshme atmosferike duke bërë që orët e paradites të paraqiten me mot të kthjellët në të gjithë MV ndërsa orët e pasdites do të sjellin vranësira në pjesën më të madhe të MV, më të theksuara vranësirat do të jenë në zonat Jugperëndimore duke rrezikuar rrebeshe afat-shkurtra shiu. Po ashtu, edhe në territorin e MV do të ketë rritje të temperaturave të ajrit duke bërë që termometri të ngjitet deri në 30°C.
Europa
Zhvillimi i një qendre të fuqishme Ciklonare në Juglindje të kontinentit do të diktojë kushtet atmosferike në brigjet e detit Egje duke bërë që rrebeshet e shiut dhe mini-stuhitë e forta të erës të jenë dominante. Po ashtu, Europa Veriore si edhe rajoni i Balltikut do të perfshihen nga vranësira dhe shira me intensitet të lartë ndërsa pjesa më e madhe e kontinentit Europian do të jetë nën ndikimin e motit të kthjellët dhe vranësirave të lehta e kalimtare./kb
