Gjykata e Lartë e SHBA-së rrëzoi të hënën një padi që kërkon të përjashtojë Donald Trump nga zgjedhjet e vitit 2024, sipas një dispozite kushtetuese që ndalon këdo që “angazhohet në rebelim ose revolucion” të mbajë poste publike.
Gjyqtarët rrëzuan ankesën e John Anthony Castro, një konsulent tatimor nga Teksasi. Castro kishte apeluar një vendim të gjykatës më të ulët që thoshte se ai nuk mund të ngrejë një padi për të kërkuar shkarkimin e Trump sipas Amendamentit të 14-të të Kushtetutës së SHBA.
Kjo mund të mos jetë hera e fundit që Gjykata e Lartë i kërkohet të vendosë për këtë çështje. Padi të tjera që përfshijnë Amendamentin e 14-të dhe Trump janë ende në pritje në gjykatat më të ulëta.
Amendamenti i 14-të thotë se “Asnjë person nuk duhet të bëhet senator ose përfaqësues në Kongres, ose zgjedhës për president dhe zëvendës president, ose të mbajë ndonjë detyrë, publike ose ushtarake, në Shtetet e Bashkuara ose në çdo shtet, i cili, pasi është betuar më parë në Kushtetutën e Shteteve të Bashkuara, është përfshirë në rebelim, ose kanë ofruar ndihmë ose azil për armiqtë e shtetit.”
Trump, kandidati kryesor në garën për nominimin republikan, ka vazhduar të bëjë pretendimin e rremë se zgjedhjet e vitit 2020 iu vodhën atij përmes mashtrimeve.
Përpjekje të tjera ligjore për të përjashtuar Trump sipas Amendamentit të 14-të janë duke u zhvilluar, duke përfshirë një padi të ngritur më 6 shtator nga grupi jopartiak Qytetarët për Përgjegjësi dhe Etikë në Uashington./I.S
