Tensionet po rriten në Bregun Perëndimor të pushtuar, ku jetojnë rreth 2.8 milionë palestinezë ndërsa ushtria izraelite ka imponuar një mbyllje të plotë. Banorët thonë se hyrjet në qytete janë mbyllur me porta hekuri dhe blloqe çimentoje.
Në disa vende janë ngritur postblloqe të reja ushtarake. Gjatë gjithë ditës ka pasur radhë të gjata në disa pika karburanti pasi furnizimet me karburant kanë mbaruar.
“Kjo është diçka që e kemi parë më parë gjatë dekadave të gjata të okupimit. Kjo është një politikë që Izraeli e përdor për dekada thjesht për të ndëshkuar të gjithë popullsinë për veprimet e grupeve të caktuara të njerëzve,” tha një banor.
Të dielën, dyqanet dhe bizneset në Bregun Perëndimor u mbyllën pasi u mbajt një grevë e përgjithshme në përgjigje të aksionit ushtarak të Izraelit në Rripin e Gazës, i cili qeveriset nga Hamasi.
Mbrëmja pati protesta të zemëruara. Katër palestinezë u qëlluan për vdekje nga ushtarët izraelitë në postbllokun e Qalandiya në Ramallah mbrëmë./I.S
