Në Ditën Botërore të Shëndetit Mendor, Zonja e Parë Armanda Begaj apeloi sot për një mjedis tolerant dhe mbështetës për të gjithë, pa stigmë e diskriminim.
Në një mesazh me rastin e kësaj dite, Begaj u shpreh se “bashkë mund të ndërtojmë një të ardhme më të shëndetshme për mendjen dhe shpirtin”.
“Çdokush është i ekspozuar ndaj fenomeneve që çojnë në mungesë të mirëqenies të shëndetit mendor. Adoleshentët dhe të rinjtë, fëmijët tanë më shumë. Koha që po jetojmë na dhuroi ngjarje tragjike: pandeminë, luftën, ndryshimet e klimës”, u shpreh ajo.
Begaj theksoi se “informacioni është fuqi, por abuzimi më të është shkatërruesi më i madh i shoqërisë”.
“T’i ndajmë me njëri – tjetrin ndjenjat e ankthit, depresionit, apo ndonjë sfide tjetër, që lenë gjurmë dhe ngarkojnë hapësirën tonë, duke shfaqur mungesë përshtatjeje e komunikimi! Të sigurojmë një mjedis tolerant dhe mbështetës për të gjithë, pa stigmë e diskriminim”, vijon mesazhi i Zonjës së Parë.
Begaj u shpreh se askush nuk duhet të jetë vetëm duke luftuar në heshtje.
“Bashkë mund të ndryshojmë! Bashkë mund të ndihmojmë njëri-tjetrin! Bashkë mund të ndërtojmë një të ardhme më të shëndetshme për mendjen dhe shpirtin”, u shpreh Begaj./ S.M
