Ministri i Brendshëm, Taulant Balla ka reaguar në lidhje me ndeshjen e Kombëtares me Çekinë që pritet të zhvillohet nesër. Ai shprehet se policia do të bëjë gjithçka për të mos lejuar incidente gjatë ndeshjes, që do të luhet në orën 20:45 në “Air Albania”.
Me anë të një postimi në rrjetet sociale, Balla i bën thirrje çdo sportdashësi që të sillet si lojtari i 12 në mbështetje të kombëtares kuq e zi.
“Policia e Shtetit do të bëjë gjithçka për të mos lejuar incidente gjatë ndeshjes Shqipëri – Republika Çeke. I bëj thirrje çdo sportdashësi të sillet si lojtari i 12 në mbështetje të kombëtares kuq e zi”, shkruan ministri i Brendshëm.
Sakaq kujtojmë që policia ka prezantuar edhe një plan masash me qëllim garantimin e sigurisë para, gjatë dhe pas ndeshjes.
Po ashtu, policia u ka bërë apel të gjithë tifozëve që të zbatojnë ligjet e shtetit shqiptar, pasi në të kundër do të përballen me sanksione penale./e.t
