Pa sanksionimin e Serbisë për sulmin e Banjskës nuk do të ketë dialog. Është ky paralajmërimi që bën kryeministri Albin Kurti, një ditë para se ai dhe Vuçiç të rinisin dialogun në Bruksel, mbi pikën më të nxehtë, asociacionin.
Duke folur për Financial Times para udhëtimit, Kurti tha se “do të përfundonin me një menaxhim të dështuar të krizës nëse Serbia nuk do të ndëshkohej“.
“Nëse nuk do të ketë dënim dhe sanksione pas asaj që bëri Serbia, pa dyshim që nuk do të ketë dialog. Do të përfundojmë me një menaxhim të dështuar të krizës dhe do të harrojmë plotësisht normalizimin e marrdhënieve.”
Kurti, po ashtu, akuzoi autorët e sulmit kundër Policisë së Kosovës në Banjskë të Zveçanit se u përpoqën “ta nisin një konflikt të ri të armatosur, për ta aneksuar pjesën veriore të vendit”.
Sipas tij, çdo gjë ka ndryshuar pas 24 shtatorit dhe ata nuk mund të vazhdojnë normalisht. Kurti i bëri thirrje përfaqësuesit të posaçëm të Bashkimit Evropian për dialogun Mirosllav Lajçak, të mos “e konsiderojë më Serbinë si forcë mbinatyrore, një lloj ariu të paarsyeshëm të cilin duhet ta ushqejmë me qengja për ta qetësuar”.
“Kjo duhet të marrë fund për hir të normalizimit, paqes dhe sigurisë”, ishin fjalët e kryeministrit kosovar./e.t
