Donald Trump pranoi sot se kompania e tij, Organizata Trump, nuk dha vlerësime të sakta të shumë prej pronave të saj në dëshminë e tij të gjatë, agresive në gjyqin e tij për mashtrim në Nju Jork.
Ish-presidenti amerikan tha se kompania nënvlerësoi pronën e tij në Mar-a-Lago, Florida, si dhe fushën e tij të golfit Doral dhe mbivlerësoi Kullën Trump në Nju Jork, ndër të tjera. Por ai u përpoq të minimizonte rëndësinë e këtyre vlerësimeve, për të cilat prokurorët e shtetit të Nju Jorkut thonë se ishin bërë qëllimisht për të marrë kushte dhe prime më të mira kredie.
“Nuk ishte e rëndësishme. Ju e bëtë të rëndësishme, por nuk ishte”, tha Trump duke iu referuar vlerësimeve.
Gjykatësi Arthur Engoron ka vendosur tashmë se këto vlerësime ishin mashtruese. Prokurorët e shtetit thonë se vlerësimet mashtruan huadhënësit dhe siguruesit, dhe duke rritur pasurinë e tij me 2 miliardë dollarë.
Trump e ka quajtur vazhdimisht rastin një “gjueti shtrigash” dhe akuzon Prokuroren e Përgjithshme Leticia James se është e motivuar politikisht kundër tij. Ai i përsëriti këto akuza nga qëndrimi i dëshmitarit, duke thënë se organet e drejtësisë ishin kthyer në mënyrë të pajustifikueshme kundër bizneseve të tij pasi ai fitoi zgjedhjet presidenciale të vitit 2016.
“Jam i sigurt se gjyqtari do të më dënojë sepse më dënon gjithmonë”, tha Trump.
Prokurori i Përgjithshëm James hodhi poshtë sulmet e Trump ndaj saj.
“Në fund, gjithçka që ka rëndësi janë fakte dhe shifra. Numrat, miqtë e mi, nuk gënjejnë”, komentoi ajo jashtë gjykatës, përpara se të fillonte dëshmia e ish-presidentit.
Trump nuk përballet me burg nëse dënohet, por mund të përballet me një gjobë të madhe prej 250 milionë dollarësh dhe ta ndalojë atë dhe dy djemtë e tij më të mëdhenj të bëjnë biznes në Nju Jork./ S.M
