Mira Murati, e cila udhëhoqi skuadrën që krijoi ChatGPT, është CEO e re e OpenAI. Organizata në fjalë u themelua në vitin 2015 dhe synon të sigurojë dobinë dhe efektet pozitive të inteligjencës artificiale.
Bordi i kësaj kompanie, vendosi që të shkarkojë nga detyra CEO-n e mëparshëm, Sam Altman, për arsye që nuk ka qenë transparent me bordin, duke mos realizuar detyrat që i takonin. Për shkarkimin e tij, nuk dihen ende detaje.
Kështu, përmes një deklarate, kompania njoftoi se detyra e Altman i kalon Mira Muratit, e cila do të jetë në krye përkohësisht:
“Bordi i drejtorëve të OpenAI, që vepron si organi i përgjithshëm qeverisës për të gjitha aktivitetet e OpenAI, njoftoi sot se Sam Altman do të largohet si CEO dhe do të largohet nga bordi i drejtorëve. Mira Murati, shefe e teknologjisë e kompanisë, do të shërbejë si CEO e përkohshme, me efekt menjëherë”, u shpreh bordi.
E themeluar në vitin 2015, OpenAI është një kompani kërkimore e mbështetur nga AI. Kompania synon kryesisht të sigurojë që inteligjenca artificiale të jetë e dobishme për të gjithë.
Mira ka lindur në Vlorë, është rritur në Shqipëri, u zhvendos në Kanada në moshën 16-vjeçare (sipas Wikipedia-s). Ajo u diplomua në universitetin “Dartmouth” në vitin 2012, në degën inxhinieri mekanike.
Pasioni i Mirës në teknologji është goxha më i hershëm se sa përvoja në ChatGPT. Sipas llogarisë së saj në LinkedIn, Mira ka qenë në krye të menaxhimit të departamentit të produkteve, përgjegjëse për modelin X në kompaninë Tesla, për 3 vite (2013 – 2016).
2 vite më vonë, pra në 2018, ajo iu bashkua edhe në ekipin e OpenAi.
ChatGPT u prezantua në nëntor të vitit 2022 dhe ndonëse disa shkolla në Amerikë e kanë ndaluar përdorimin e kësaj risie, vetë Microsoft njoftoi se do të investonte plot 10 miliardë dollarë në kompani. Ndërsa, në janar, “ChatGPT” ishte një ndër termat më të kërkuar në Google, duke tejkaluar kështu edhe kërkimet për “bitcoin”./E.Ç
