Walter Mazzarri e nis me “këmbë të mbarë” rrugëtimin te Napoli, ndërsa mori fitoren 1-2 në transfertën e Atalantës, që ishte edhe ndeshja e tij e parë në krye të stolit të kampionëve të Italisë.
“Derbi shqiptar” Berat Gjimshiti-Amir Rrahmani, sfidë e vlefshme për javën e 13-të të Serie A rezultoi shumë e luftuar, ndërsa në fund foli për miqtë.
Napoli pati mundësinë për të zhbllokuar takimin që në minutën e 34’ me Rrahmanin, por goli i mbrojtësit “dardan” u anulua për pozicion të parregullt pas verifikimit në VAR.
Ndërsa vetëm dhjetë minuta më pas i asistuar nga Di Lorenzo, Kvaratskhelia kaloi ekipin e Mazzarrit në avantazh.
Në nisje të fraksionit të dytë, Atalanta u shfaq më kërkuese dhe në minutën e 53’ Lookman e nguli topin në rrjetë me një goditje të fortë me kokë.
Takimi vazhdoi me barazimin 1-1 deri në minutën e 79’, kur i asistuar me plot altruizëm nga Osimhen, Elmas riktheu avantazhin te ekipi i tij dhe vulosi këtë sfidë.
Pas kësaj jave, Atalanta renditet në vend të gjashtë me 20 pikë, teksa Napoli në vend të tretë me 24 pikë.
