Tirana e ka të pamundur të regjistrojë një seri prej disa fitoresh radhazi në Abissnet Superiore. Pas triumfit me përmbysje pak ditë më parë ndaj Kukësit, bardheblutë u rikthyen sërish tek humbja, pasi u mundën 1-0 nga Erzeni në Rrogozhinë.
Tirana e Julian Ahmatajt e nisi me ambicie takimin dhe brenda 10 minutave të para regjistroi dy raste të rrezikshme shënimi. Florent Hasani i shkoi shumë pranë golit për bardheblutë në minutën e 3′, por tentativa e sulmuesit anësor u ndal nga shtylla.
Pjesa e dytë foli për kryeqytetasit që u përpoqën për golin e barazimit, por hasën në rezistencën e lartë të shijakasve.
Festa e bardhebluve shpërtheu në minutën e 71′, pas golit të realizuar nga Filip Najdovski me kokë. Gjithsesi, festa ishte vetëm në mënyrë provizore për Tiranën, teksa pas tre minutash monitorim në VAR, kryesori Dyrmishi e konsideroi golin të parregullt dhe loja vijoi 1-0 në favor të Erzenit.
Pavarësisht se me vuajtje, Erzeni ruajti me sukses epërsinë deri në vërshëllimën finale dhe regjistroi tri pikë të vyera, pas pesë ndeshjesh radhazi në kampionat pa fitore dhe në këtë mënyrë ngjitet në mënyrë provizore në vendin e 6-të me 16 pikë. Nga ana tjetër, Tirana humbet shansin për të shkuar me moralin e duhur në derbin e kryeqytetit ndaj Partizanit të dielën dhe mbetet në vendin e 3-të me 21 pikë.
