Agjencia Kombëtare e Mjedisit ka publikuar një raport ku ka renditur plazhet me cilësinë më të mirë në vendin tonë si dhe ka bërë me dije nivelin e pastërtisë në plazhe.
Sipas raportit shumica e plazheve në Shqipëri rezulton se kanë ujë të pastër.
Plazhet më cilësinë më të mirë të ujit për larje në bregdetin Adriatik janë ato të Shëngjinit, Velipojës, Tales, Spitallës, Semanit, Darzezës dhe Divjakës.
Në raport thuhet se 100% e ujërave bregdetarë në këto plazhe përgjatë vitit 2022 kishin cilësi të shkëlqyer.
Sa i përket ujërave të bregdetit Jonian nga raporti rezulton se:
Plazhet krejtësisht të pastra rezultojnë ato të Palasës, Zvërnecit, Dhërmiut, Drimadhes, Jalës, Livadhes, Qeparoit, Borshit dhe Lukovës. Në bregdetin e këtyre plazheve nuk është gjetur asnjë stacion me cilësi të keqe uji.
Thuhet se 67.5 % e stacioneve të plazheve në Shqipëri në vitin 2022 kishin cilësi të shkëlqyer uji për larje, 19.5% cilësi të mirë, 4.1 % cilësi të mjaftueshme, ndërsa 8.9% cilësi të keqe.
Krahasuar me vitin 2021, numri i stacioneve të plazhit me cilësi shumë të mirë është rritur, ndërsa i atyre me cilësi të keqe është ulur.
Në raportin e Agjencisë Kombëtare të Mjedisit thuhet se në 11 stacione plazhesh duhen marrë masa të menjëhershme për përmirësimin e cilësisë së ujit.
Konkretisht 50% e stacioneve të plazhit të Sarandës, 33% e stacioneve të plazhit në Ksamil, 20% e plazheve të Vlorës dhe 14% e plazheve të Durrësit janë me cilësi të keqe.
Aktiviteti I banorëve të zonës por dhe i vizitorëve si dhe shkarkimi i ujërave urbane të pa trajtuara kanë ndikuar në cilësinë e ujit./ S.M
