Shtrëngohen kushtet për kompanitë e sigurimeve
Autoriteti i Mbikëqyrjes Financiare, AMF ka publikuar projekt-rregulloren për fondet e pensioneve private dhe funksionimin e tyre. Sipas dokumentit propozohet që depozitari, ndërmjetësi që do të kryejë transaksionet midis shoqërisë dhe anëtarëve të fondet, duhet të jetë vetëm një bankë ose degë e një banke të huaj, e licencuar nga AMF. Udhëzimi specifikon se bankës i ndalohet të përdorë asetet e individëve të fondit, siç përdor ato të klientëve të vet.
Deri më tani, në Shqipëri një licencë të tillë e mbajnë kompanitë e sigurimeve. Ndërkohë që për të përfituar të drejtën e ushtrimit të fondit privat të pensionit, kërkohet një kapital jo më pak se 15,800,000 lekë, një plan menaxherial 5-vjeçar edhe analizën e riskut.
Ndër ndryshimet në ligjin e ri është ai i uljes së kostos administrative në 2.5% nga 3% që ishte dhe rritja e vlerës së pazbatueshme. Po ashtu, pagesat që merr anëtari i fondit privat, nuk do të tatohen më si e ardhur personale, por do të tatohen vetëm për kthimin nga investimi, norma mbetet 15%.
Sipas ministrisë së financave dhe ekonomisë, skema e pensioneve në vend do t’i nënshtrohet një reformimi me asistencën e FMN, pjesë e rekomandimeve të së cilës ka qenë edhe kolona e dytë e fondit privat./O.S
