Ndryshe nga çdo 8 dhjetor, ky i fundit ishte më i vakët në kujtesën e ish-kryeministrit Sali Berisha, protagonist kryesor në lëvizjen studentore 1990, që solli më pas edhe përbysjen e sistemit komunist.
Edhe pse në krye të pjesës më të madhe të PD-së, Berisha dhe mbështetësit e tij shigjetuan kundërshtarin për “goditje ndaj demokracisë”.
Në një sallë të vogël, ku pjesëmarrësit numëroheshin lehtësisht, ish-kryeministri Sali Berisha dhe disa mbështetës të tij, mes të cilëve shumë pak të pranishëm të levizjes së dhjetorit 1990, kujtoi këtë datë historike.
Ajo njihet si “dita e rinisë”, por për Shqipërinë ka dyfish domethënie pasi këtu e 33 vite më parë nisën shkëndijat serioze të përbysjes së sistemit komunist.
Megjithatë Berisha si një nga protagonistët e asj periudhë dje u ndje edhe më pezimist, teksa pranoi se tashmë kjo “datë ka njohur rënie”. Lëvizja studentore u kujtua nga ish kryeministri Sali Berisha dhe mbështetësit e tij, ndërsa jo shumë larg u zhvillua Kongresi i Partisë Socialsite ku shigjetuan njeri tjetrin në distancë.
Mes librave dhe fotografive të kohës, kështu u kujtua 8 Dhjetori nga Partia Demokratike e Rithemelimit. Themelues të partisë e drejtues aktualë kujtuan lëvizjen studentore, si një ngjarje që ndryshoi historinë e kombit.
Sali Berisha në fjalën e tij teksa lartësoi lëvizjen e dhjetorit, pohoi se studentët në luftën kundër diktaturës vetëm guximin kishin armën e tyre. “Ata në fakt ishin në vetmi aty, të themi të vërtetën. Ata ishin në vetmi. Ata përveç njëri-tjetrit nuk kishin, ishin në një braktisje në atë rrugë, por nuk u mposhtën”, tha ish kreu historik i Partisë Demokratike.
Por për Berishën është koha për reflektim. “Dhjetori kishte fillimin, ngjitjen, por përjetoi dhe rënien e tij. Kjo është e vërteta”, tha ai. Kreu i Rithemelimit e drejton gishtin e akuzës tek kundërshtari i tij politik, Edi Rama, të cilin e bën fajtor për zhbërjen e vlerave të 8 dhjetorit.
Sipas Berishës, qëllimi i Ramës është kuptuar me vonesë por sërish thotë se është koha për reagim. “Rilindja e Edi Ramës në qoftë se nuk u kuptua atëherë, tani është e qartë si drita e diellit. Ishte zhbërja, ishte hakmarrja ndaj demokracisë.
Në 10 vite ai ia doli të zhbëjë një nga një arritjet e 8 dhjetorit”, tha ai. Ky 8 dhjetor është një kushtrim për çdo shqiptar, të ngrihemi me sakrifica, me vendosmëri, të përmbysim diktaturën e re”.
Një prej themeluesve të Partisë Demokratike, Besnik Mustafaj, 8 Dhjetorin e konsideroi si datën më historike për të djathtën shqiptare ndaj dhe kërkoi që kjo datë të lartësohet nga të gjithë.
Ky kremtim i 8 Dhjetorit duhet të bëjë pjesë në një punë të organizuar që duhet të bëjë Partia Demokratike për t’i mbajtur për t’i nxjerr në dritë dhe për t’i lartësuar simbolet e saj. Nuk ka asnjë të djathtë në botë pa simbole të fuqishme, ne i kemi simbolet vetëm duhet t’i nxjerrim në dritë”, tha Berisha. Ai ka kujtuar me nostalgji edhe vitin 1991.
“Më 8 dhjetor, studentët nisën lëvizjen që do të ndante epokat për kombin shqiptar. Kjo lëvizje dallohet nga të gjitha lëvizjet e tjera antikomuniste të Evropës Lindore. Kjo ishte tërësisht një revoltë e frymëzuar nga idealet e të rinjve shqiptarë. Nuk kishte parti apo organizatë që i thirri ata.
Dolën përballë diktaturës falë guximit të tyre epik, për idealet e tyre të lirisë, që ata nuk e njihnin, pasi kishin lindur dhe ishin rritur në diktaturë. Liria për ta ishte një aspiratë, që buronte nga ndërgjegja, nga idealet e tyre. Ata kishin përballë kur dolën në shesh një diktaturë të egër, e cila sado që e lodhur, por ekzekutonte bashkëmoshatarët e tyre çdo javë në kufi.
Dhe jo vetëm kaq, por zvarriste trupat e të rinjve të rënë në sheshet e qyteteve për të kallur tmerr dhe frikë. Në këto kushte nisën betejën e tyre studentët dhe atë ditë jemi gjetur përballë tyre me datën 9 ne me Besnik Mustafën, Kujtim Çashkun dhe ndonjë tjetër. U përballëm me një skenë të paparë ndonjëherë në jetën tonë.
Aty ishin një grup prej 700, 800 apo mbase 1 mijë studente. Por ata ishin një grup prej 1 mijë heronjsh. Ne nuk kishim lexuar, nuk kishim parë kurrë një numër kaq të madh heronjsh, të cilët kishin përballë mjetet më të egra të diktaturës, hanxharët e saj.
Dhe ata u vërsulën drejt tyre në mënyrë mizore, i rrahën në mënyrën më barbare, por të pathyeshëm, të pamposhtur, ata do mblidheshin përsëri pasdite në betejë kundër diktatorit”, kujton Berisha.
PD e Bashës
Paralelisht me këtë aktivitet, Partia Demokratike zyrtare 8 Dhjetorin e kujtoi me të rinjtë, ku mungoi Lulzim Basha që ende vijon vizitën në SHBA.
Në një takim të drejtuar nga deputetja më e re, Andia Ulliri, mbështetësit e Bashës kujtuan protestën e 33 viteve më parë, duke e konsideruar këtë datë si pikën kulmore kundër diktaturës komuniste.
Urimet
Deputeti Gazment Bardhi ka uruar 8 dhjetorin, duke shkruar se të rinjtë janë e djeshmja, e sotmja dhe e ardhmja e Shqipërisë. “Të rinjtë janë e djeshmja, e sotmja dhe e ardhmja e Shqipërisë. Mirënjohje për sakrificën dhe kontributin e Lëvizjes Studentore 90”, shkruan Bardhi. Kryetarja e Kuvendit, Lindita Nikolla ka uruar 8 dhjetorin.
Nikolla shkruan se të rinjtë nuk janë vetëm brezi i ardhshëm, por e sotmja e Shqipërisë evropiane. “Në Ditën Kombëtare të Rinisë përshëndes vajzat dhe djemtë e Shqipërisë, nxënësit, studentët, specialistët, punonjësit dhe punëtorët e rinj.
Moshat e reja nga 15-30 vjeç përbëjnë rreth 22 përqind të popullsisë dhe janë një potencial dhe faktor i fuqishëm i zhvillimit të vendit. Kuvendi i Shqipërisë mbështet rritjen e aksesit për të rejat dhe të rinjtë shqiptarë, në arsimim e formim, tregun e punës, sipërmarrjen, shoqërinë civile dhe mbi të gjitha talentin dhe lidershipin e tyre në teknologjinë dhe inovacionin.
Rinia është jo vetëm brezi i ardhshëm, por e sotmja e Shqipërisë evropiane.”, shkruan znj. Nikolla.
Ambasada e SHBA në Tiranë ka reaguar për Ditën e Rinisë, duke thënë se në 8 dhjetorin e vitit 1990, Amerika ka qenë krah shqiptarëve teksa kërkuan një vend “si pjesa tjetër e Evropës”. Ambasada e SHBA shkruan se sot qëndron me krenaria krah Shqipërisë ndërsa bën hapin e radhës drejt anëtarësimit në BE.
“Sot kujtojmë rininë dhe studentët shqiptarë që nisën protestat e 8 dhjetorit 1990 që sollën rënien e regjimit komunist dhe lindjen e demokracisë.
Shtetet e Bashkuara qëndruan pranë të rinjve dhe qytetarëve të Shqipërisë teksa kërkuan një vend “si pjesa tjetër e Evropës” dhe ne qëndrojmë me krenari pranë jush sot ndërsa Shqipëria bën hapin e saj të radhës drejt anëtarësimit të plotë të Bashkimit Europian”.
Presidenti Bajram Begaj, uroi sot 8 Dhjetorin, Ditën e Rinisë. Presidenti zgjodhi që këtë urim ta bëjë së bashku me studentët që kryen praktikën në Institucionin e Presidentit.
“Bashkë me studentët e shkëlqyer të Fakultetit të Drejtësisë, të Shkencave Sociale dhe Histori-Filologjisë, që kryen praktikën në Institucionin e Presidentit ju urojmë :Gëzuar Ditën e Rinisë! Energjia, pasioni dhe disiplina që ata treguan gjatë veprimtarisë së tyre si praktikantë, janë shpresëdhënëse për një Shqipëri më të mirë”, shkroi Presidenti në Facebook-un e tij.
Institucioni i Presidentit aplikoi për herë të parë zhvillimin e praktikave për studentë duke u bërë kështu pjesë e Programit Kombëtar të Praktikave të Punës.
