Mesa duket Usher e ftoi Justin Bieber që të performonte me të në Super Bowl, por këngëtarit të hitit “Baby” nuk i pëlqeu shumë si ide, ndaj refuzoi ftesën, thonë burime për Page Six.
Disa ditë para eventit të madh të Super Bowl, qarkulluan thashetheme se Justin Bieber do të ngjitej në skenë, duke performuar me Usher, para rreth 65,000 shikuesve në stadium dhe miliona të tjerëve që do ta ndiqnin performancën përmes ekranit.
Por, kjo nuk ndodhi dhe në mes të shikuesve në stadium, ishte edhe Justin Bieber, së bashku me bashkëshorten, Hailey. Por, pse zgjidhi Justin ta refuzonte ftesën e Usher për të performuar në një skenë gjigante si ajo e Super Bowl?
Një burim tha për Page Six se nuk ka asnjë hatërmbetje mes Usher dhe Justin. Ky i fundit thjesht nuk e përqafoi si ide. Megjithëse Usher bëri maksimumin, sërish nuk ia doli dot ta bindte mikun e tij.
Justin prej kohësh nuk është rikthyer me një projekt muzikor. Ai anuloi datat e mbetura të turneut të tij “Justice” në shtator të vitit 2022 dhe zbuloi se ishte diagnostikuar me sindromën Ramsay Hunt, e cila mund të shkaktojë paralizë të fytyrës dhe humbje të dëgjimit./E.Ç
