Zhvillohet në Gjykatën e Posaçme Kundër Korrupsionit dhe Krimit të Organizuar seanca e fundit për çështjen ndaj kryebashkiakut të zgjedhur të Himarës, Fredi Beleri. Në këto momente, trupa gjykuese është tërhequr për të marrë vendimin përfundimtar për Belerin.
Sipas raportimeve mediatike, gjatë seancës pati tensione mes gjykatës, avokatit të Fredi Belerit dhe këtij të fundit personalisht.
“Unë kërkoj drejtësi, më është cënuar e drejta për një proces të rregullt ligjor”, mësohet të ketë thënë Beleri, sipas të cilit i është cënuar prezumimi i pafajësisë.
Prokuroria e Posaçme ka kërkuar dënimin e Fredi Belerit me 2 vite e 6 muaj burg, për akuzën e korrupsionit zgjedhor. SPAK pretendon se me anë të përgjimeve dhe vëzhgimeve ambientale të kryera ndaj Belerit dhe bashkëpunëtorëve të tij para zgjedhjeve të 14 Majit, si dhe dëshmisë së një personi që zgjodhi të bashkëpunonte me drejtësinë, ka konfirmuar se Beleri dhe shtabi i tij elektoral kanë dhënë para gjatë fushatës elektorale për të siguruar vota.
Nga ana tjetër avokatët e Belerit i kanë konsideruar përgjimet e kryera fillimisht nga prokuroria e Vlorës si të paligjshme./O.S
