João Félix pritet të luajë ndeshjen e tij të fundit për Barcelonën në Sevilje, këtë të diel, për raundin e fundit të La Liga 2023/24.
Sipas “Sport”, vazhdimësia e portugezit nuk është mes prioriteteve të katalanasve për këtë merkato verore dhe një huazim i ri nga Atletico e Madridit, që ka në pronësi kartonin e portugezit, nuk është një opsion.
Edhe pse ai ishte shpesh titullar në gjysmën e parë të sezonit, në pjesën e dytë nuk ndodhi kështe, pasi Xavi zgjodhi ta aktivizonte përgjithësisht në pjesën e dytë të ndeshjes.
Trajneri spanjoll po largohet nga stoli i Barçës, por as mbërritja e trajnerit të ri, që sipas shtypit spanjoll është Hansi Flick, nuk do të ndryshojë të ardhmen e anësorit.
Një rikthim tek Atlético e Madridit është përjashtuar prej kohësh, pas polemikave mes lojtarit 24-vjeçar dhe Diego Simeone, ish-trajner i tij, dhe për këtë arsye menaxheri i lojtarit, Jorge Mendes, është në kërkim të një klubi të ri.
Gjatë një sezoni me fanellën e Barçës ish-lojtari i Benficas shënoi dhjetë gola dhe dha gjashtë asistime në 43 ndeshje (në pak më shumë se gjysma si titullar) në të gjitha garat.
