Prokuroria Speciale e Kosovës ka ngritur akuzë kundër dy priftërinjve ortodoksë shqiptarë, Niko Bllazhde, i njohur edhe si Nikolla Xhufka dhe Lejdi Zagalli, me akuza për nxitje të urrejtjes kombëtare, fetare dhe etnike si pasojë e hyrjes në një kishë ortodokse serbe të pashfrytëzuar në nëntor të vitit të kaluar.
Bllazhde dhe Zagalli dyshohet se kanë mbajtur një liturgji në kishën në verilindje të Kosovës dhe kanë paralajmëruar Kishën Ortodokse Serbe se rrezikon “zjarret e ferrit” nëse përpiqet të ndërhyjë.
Pas ngjarjes, Bllazhde ka bërë të ditur në Facebook se “kisha 500-vjeçare tashmë mban emrin “Fan Noli” dhe është nën juridiksionin e Kishës Kombëtare Ortodokse Shqiptare “Shën Kozmai” të Elbasanit”. Bllazhde ka lindur në Elbasan, në Shqipërinë e mesme.
Dioqeza Rashkë-Prizren e Kishës Ortodokse Serbe denoncoi veprimet e tyre, duke thënë se ishte një “akt kriminal” dhe “një tjetër akt në serinë që synon uzurpimin e trashëgimisë shpirtërore dhe kulturore të Kishës Ortodokse Serbe në Kosovë”.
“Dioqeza Rashkë-Prizren ka vite që e ka theksuar procesin e përvetësimit kulturor të trashëgimisë sonë”, thuhet në reagim. “Ky incident i fundit konfirmon pretendimet tona, këtë herë në një mënyrë të pamohueshme dhe jashtëzakonisht shqetësuese”.
Në një deklaratë për “Kosova Online” (gazetë nën ndikimin e propagandës serbe), tre ditë pas liturgjisë, Kisha Ortodokse Shqiptare u distancua nga Bllazhda, duke e quajtur atë “mashtrues dhe person që nuk është prift”. Sipas prokurorëve, të dy personat i kanë mohuar akuzat./kb
