Deputeti Lulzim Basha i ftuar në një intervistë televizive, tha se nëse logoja e vula e PD-së mbeten peng të lojërave të Ramës me Berishën, atëherë do të gjenden format dhe mënyrat që alternativa e re që ai propozon të jetë para shqiptarëve.
Sipas Bashës, ka ardhur koha që shqiptarët të ndahen me të kaluarën dhe me zgjedhjen “më pak i korruptuar” dhe të përqafojnë një kulturë të re politike, dhe pse jo një formacion të ri politik.
“Për t’iu kundërvënë kësaj ne nuk kemi nevojë as për logo, as për vula as për karrige. Kemi nevojë të besojmë tek Shqipëria, të besojmë se me mundësitë e Shqipërisë mund të ndihmohet çdo shqiptar dhe me ekspertizën më të mirë, por dhe me një vullnet të hekur politik këtë program t’ia paraqesim shqiptarëve.
Grup interesi, pas grupi interesi. Që nga gazetarët në median e lirë, tek fermerët, nga profesionistët e lirë tek rinia, nga pensionistët tek administrata, forcat e armatosura, të përndjekurit.
Programi ynë është i plotë dhe koha që kemi në dispozicion nga sot deri kurdo të shpallen zgjedhjet jo për t’i shkuar nga pas tangos së kryeministrit me ish-kryeministrit, por për t’i thënë shqiptarëve që ka një alternativë për t’ia dhënë atyre këtë alternativë.
Është përgjegjësia e shqiptarëve të votojnë dhe afërmendsh vota e shqiptarëve në zgjedhjet e ardhshme do të jetë ose për dyshen e vjetër, kryeministër dhe ish-kryeministër me sentencën se kush është më pak i korruptuar ose për përqafimin e një kulture të re politike, pse jo edhe të një formacioni politik në kuptimin e burrave, grave, të rinjve dhe të rejave që unë shpresoj nëse drejtësia vihet në vend do të ketë logon dhe vulën e Partisë Demokratike të Shqipërisë. Në çdo rast kjo alternativë nuk do t’i mohohet Shqipërisë .
Nëse logoja e vula e PD-së mbeten peng të lojërave të Ramës me Berishën për hesap të Ramës padiskutim do të gjejmë format që kjo alternativë të jetë para shqiptarëve dhe shqiptarët ta kenë mundësi ta zgjedhin.”/E.T