Në kulmin e vapës dhe temperaturave të larta të sezonit, nuk ka asgjë më freskuese se disa orë të kaluara në pishina, që në fakt kthehen në ambiente të tejmbushura me njerëz.
Megjithëse kimikatet në ujë (si klori dhe bromi) përdoren për të dezinfektuar ujin, duke vrarë shumë baktere dhe viruse që “gëlojnë” në pishinat e mbushura me njerëz nga të gjitha grupmoshat, sërish ka disa probleme shëndetësore që i bëjnë njerëzit të rrezikohen nga frekuentimi i pishinave.
“Ju mund të prekeni nga disa probleme shëndetësore teksa notoni, pikërisht nga uji i kontaminuar me mikrobe,” thotë Jasen Kunz, drejtues i një programi për ujin e shëndetshëm në Qendrat për Kontrollin dhe Parandalimin e Sëmundjeve në New York.
Ja për cilat bëhet fjalë:
– Diarreja
Miliona mikrobe mund të futen në ujë, sidomos kur njerëzit tregohen të pakujdesshëm me higjienën në pishinë.
Grimca dhe mikrobe të ndryshme dalin nga trupi i njerëzve dhe ato mund të gëlltiten me ujin gjatë notit në pishinë. “Njerëzit që kanë sistem më të dobët imunitar janë më të rrezikuar të marrin infeksione dhe në varësi të patogjenit mund të jenë të vjella, diarre apo dhimbje stomaku,” thotë Clare Rock, pedagoge në “Johns Hopkins University School of Medicine”.
-Mund të përjetoni infeksion në vesh
Ky është një infeksion i shkaktuar nga bakteret kur uji i pishinës qëndron në kanalin e jashtëm të veshit. Kur uji qëndron atje për një kohë të gjatë, ai ndikon në gjendjen e dyllit dhe lëkurës mbrojtëse dhe siguron një mjedis të lagësht për bakteret që të shumohen në zonën e veshit.
-Kimikatet në ujë mund të shkaktojnë skuqje të syve ose kollë të fortë
Acarimi mund të ndodhë kur klori në pishinë kombinohet me djersën, urinën dhe papastërtitë, e që të gjitha këto kthehen në faktorë kërcënues për sytë dhe shëndetit tuaj. Këto kimikate, të quajtura kloraminat mund të shkaktojnë skuqje dhe kruaje të syve, acarim të hundës, kollë dhe probleme në frymëmarrje.
Disa këshilla si të tregoni më shumë kujdes për të mbrojtur veten nga këto probleme shëndetësore:
#1 Shikoni pastërtinë e ujit
Para se të futeni në ujin e pishinës, shihni nëse kthjelltësia e ujit shihet me sy të lirë! Kuptoni nëse ka erë të fortë klori, a ka pajisje sigurie rrotull dhe nëse ka ndonjë të dhënë të shkruar për cilësinë e ujit.
#2 Shmangni futjen e mikrobeve në pishinë
Nëse keni fëmijë të vegjël, ndërrojini më parë jashtë pishinës pelenat dhe më pas futuni të notoni, mos urinoni në pishinë, shpëlahuni mirë në dushe etj.
#3 Merrni masa të tjera paraprake për të zvogëluar rrezikun
Një nga gjërat më të mëdha për të shmangur është gëlltitja e ujit. Gjithashtu, qëndroni jashtë ujit nëse keni një plagë të hapur ose përdorni një fashë për të mbuluar plagën nëse nuk doni të rrezikoni veten dhe të tjerët./E.Ç
