Giorgio Armani, njeriu i cili bëri revolucion në fushën e modës, ka festuar 90 vjetorin e lindjes. Një emër që njihet nga të gjithë, ndoshta edhe nga ata që mendojnë se janë jashtë kornizave të modës.
Me Giorgio Armani sot identifikohen produkte relativisht të luksit si kostumet, të brendshmet, mobilimi i shtëpisë, hotelet e deri tek çokollata e kozmetika. Historia e tij filloi gati 5 dekada më parë, kur ai ishte 41 vjeç. Armani themeloi markën e tij me të njëjtin emër në vitin 1975, pas vitesh pune dhe dizajnimi për marka të tjera italiane.
Në një intervistë teksa ka folur për punën dhe jetën e tij, revolucionari i modës u shpreh, se ende sot ditët e tij janë shumë të ngjeshura me punë dhe risi.
“Ditët e mia janë plot me punë, por më pëlqejnë që janë kështu. Unë ndjek një rutinë strikte që më jep kohën dhe hapësirën për të punuar në mënyrë të përqendruar dhe kjo është ajo që më bën të lumtur. Unë rrallë e humb frymëzimin tim. Edhe nëse ndodh, unë i drejtohem shtyllave të mia, duke filluar me të provuarit dhe të vërtetën time. Frymëzimi im i parë dhe më i madh vjen nga bota dhe nga vëzhgimi i njerëzve. Unë i kam shoqëruar gjithmonë ndryshimet sociale, duke ofruar një përgjigje elegante ndaj nevojave reale. Kjo është ajo që unë vazhdoj të aspiroj”, u shpreh Giorgio.
Në lidhje me mungesën e një arsimi formal për fushën e modës, ai shprehet: “Për mua procesi krijues është instinktiv. Unë e di se çfarë synoj dhe e di se çfarë më pëlqen dhe kur e kam arritur atë. Unë gjithashtu e di kur nuk është e drejtë dhe si ta korrigjoj atë. Nuk jam i sigurt se talenti dhe kreativiteti kanë të bëjnë me trajnimin formal, por sigurisht që nuk jam në kundërshtim që njerëzit të trajnohen zyrtarisht. Picasso, në fund të fundit, ishte formalisht i trajnuar dhe ai e përdori këtë si trampolinë për risitë e tij të jashtëzakonshme”./E.Ç
