Tri parti parlamentare dhe jo parlamentare, kanë dërguar në Gjykatën Kushtetuese Ligjin e ri Elektoral që u votua më 26 korrik në Parlamentin Shqiptar, në seancën e fundit të mbylljes së sesionit. Dashamir Shehi i LZHK si dhe përfaqsuesit e “Nismës “Thurje” dhe “Shqipëria Bëhet” kanë paditur PD-PS për listat gjysëm të hapura.
PS dhe PD u bënë bashkë për të ndryshuar Ligjin Elektoral, por kjo nuk ka lënë të kënaqur partitë e vogla. thelbi mbetet diskutimi për “listat gjysmë të hapura” të cilat mbesin në duart e kryetarëve të partive. Pas një seancë maratonë Kuvendi më 26 korrik miratoi me 106 vota pro, 2 kundër dhe asnjë absetim, ndryshimet e reja në Kodin Zgjedhor që parashikon që lista e deputetëve nuk do të jetë tërësisht e hapur. 1/3 do të jetë e mbyllur dhe ekskluzivitet i kryetarit të partisë dhe nuk i nënshtrohet votës preferenciale. Ndërsa kandidatët në 2/3 e listës do të luftojnë për të fituar qoftë edhe një votë më shumë se të tjerët. Për herë të parë do të votojnë shqiptarët që jetojnë jashtë. Por vetëm një muaj pas votimit partitë politike që nuk përfaqësohen në Parlament janë ngritur për ta dërguar Kodin e Ri elektora në Gjykatën Kushtetuese. Sipas tyre, në Kodin e Ri nuk ka lista të hapura, gjë që ishte kërkesë jo vetëm nga partitë e vogla, por në dukje për këtë ishtë e interesuar edhe Partia Demokratike e Sali Berishës si dhe Lulzim Bashës, që ju rrëzua amendamenti.
Padi në Kushtetuese
Deputeti njehrësh kryetari i Lëvizjes për Zhvillim Kombëtar, Dashamir Shehu, ka paditur në Gjykatën Kushtetuese ndryshimet në Kodin Zgjedhor, të miratuara në Kuvend më 26 korrik. Në padi specifikohet se deputetët duhet të vendosen nga qytetarët, jo partitë, ndërsa ka kërkuar lista të hapura. Padia ka të bëjë me listat e kandidatëve për deputetë duke pretenduar se shndërron në ligj një marrëveshje politike që synon kufizimin dhe zvogëlimin e të drejtave kushtetuese të qytetarëve. Avokati i Lëvizjes për Zhvillim Kombëtar Rezart Kthupi, tha para mediave pasi dorëzoi padinë se: “Dorëzova kërkesë-padinë që kishte për objekt shfuqizimin e asaj pjese të kodit zgjedhor që cenonte atë që ishte diskursi më i madh politik, ai i listave të hapura. I kemi kërkuar Gjykatës shfuqizimin e asaj pjese që mbyll përfundimisht listat në versionin më të keq në krahasim me vitin 2021 dhe të shqyrtojë çështjen proceduriale sesi është miratuar ky ligj. Në gjykimin tonë çështja e listave të hapura janë momenti kyç që mund të sjellë ndryshim e demokratizim të partive politike dhe interesi i qytetarëve”. Përfaqësuesi i Nismës “Thurrje” Pano Soko ka komentuar ashpër ndryshimet e fundit në Kodin Zgjedhor, duke paralajmëruar se Nisma Thurje dhe lëvizja “Shqipëria Bëhet” janë duke përgatitur një draft-padi për ta paraqitur në Gjykatën Kushtetuese. Soko e cilësoi Kodin e ri Zgjedhor si një farsë që bie ndesh me moralin demokratik dhe Kushtetutën e Shqipërisë. Ai theksoi se ndryshimet e miratuara do të çojnë në një sistem ku 90% e deputetëve do të zgjidhen nga listat e mbyllura, duke e privuar qytetarin nga e drejta për të zgjedhur përfaqësuesit e tij në parlament. “Ajo që ndodhi ishte farsë që bie ndesh me moralin demokratik dhe me Kushtetutën. Duke qenë se ka shumë parti në zgjedhje, mendoj se 90% e deputetëve do dalin nga listat e mbyllura. Deputeti i Republikës së Shqipërisë duhet të zgjidhet nga zgjedhësit, jo nga kryetari i partisë,” deklaroi Soko, duke nënvizuar nevojën për një reformë që t’i japë më shumë fuqi qytetarëve në procesin zgjedhor.
