Krokodilët dhe gjarpërinjtë kanë ikur nga një kopsht zoologjik i madh pasi përmbytjet goditën veriun e Nigerisë, paralajmëruan sot autoritetet lokale.
80% e kafshëve të egra të vendosura në kopshtin zoologjik Santa Chiarimí, si luanët, buallet dhe strucat, u rrëmbyen nga ujërat dhe u mbytën. Por “disa kafshë të rrezikshme si krokodilat dhe gjarpërinjtë kanë dalë në rrugë,” thanë autoritetet e shtetit Borno, duke u kërkuar banorëve të jenë më të kujdesshëm.
Përmbytjet nisën kur një digë u tejmbush për shkak të reshjeve të mëdha. Mijëra njerëz u detyruan të linin shtëpitë e tyre.
Fatkeqësia goditi gjithashtu infrastrukturën tjetër në qytetin e Maiduguri, duke përfshirë zyrën postare dhe një spital universitar, tha zyra e presidentit nigerian Bola Tinubu. Presidenca u bëri thirrje banorëve që të evakuojnë zonat më të prekura.
“Presidenti Tinubu shpreh ngushëllimet e tij më të thella për qeverinë dhe popullin e shtetit, veçanërisht familjet që humbën mjetet e jetesës për shkak të fatkeqësisë së shkaktuar nga tejmbushja e Digës Alaou,” shtoi ai, duke siguruar se nevojat humanitare të të prekurve do të merren parasysh.
Përmbytjet në Nigerinë verilindore kanë vrarë të paktën 49 persona gjatë muajit të kaluar. Në vitin 2022, të vdekurit nga përmbytjet arritën në 600. S.B
