Nëse edhe ti ëndërron për një jetë plot me pasuri dhe bollëk, e kuptojmë – kush nuk e do një jetesë ku paratë nuk janë shqetësim? Shumë prej nesh dëshirojnë të shohin një rrugë të ndritur përpara dhe të gëzojnë çdo moment me liri të plotë. Por, për ta kthyer këtë dëshirë në realitet përmes manifestimit, duhet të përkushtohesh.
Manifestimi është si një fabrikë personale dëshirash që merr dëshirat e tua më të thella dhe i kthen ato në realitet duke përafruar mendimet, ndjenjat dhe veprimet e tua me ato ëndrra. Nuk është ndonjë magji, por një përputhje e mendimeve, ndjenjave dhe veprimeve për të ndërtuar jetën që dëshiron.
Fillimi i muajit është momenti perfekt për të manifestuar pasuri dhe bollëk. Është sikur po hap një libër të ri dhe jeta jote ndodhet në faqen tjetër, gati për t’u hartuar sipas dëshirës tënde. Ndaj, fillo duke menduar se çfarë dëshiron të arrish – qëndrueshmëri financiare, një shtëpi ëndrrash, një jetë të qetë apo lirinë për të eksploruar botën.
Merr pak kohë për të reflektuar mbi ato që dëshiron vërtet sa i përket pasurisë dhe bollëkut. Shkruaji ëndrrat dhe qëllimet në detaje – qartësia mund të bëjë diferencën.
Trego mirënjohje për çfarë ke
Mirënjohja është një element i fuqishëm në procesin e manifestimit. Para se të nisesh për të arritur dëshira të reja, ndalo dhe vlerëso atë që tashmë ke. Kjo ndjenjë pozitive që po kultivon është si një magnet që tërheq më shumë të mira drejt teje.
Vizualizo jetën që dëshiron
Mbyll sytë dhe imagjinoje veten duke jetuar jetën e ëndrrave të tua. Përjeto lumturinë dhe kënaqësinë që sjellin këto përjetime. Vizualizimi i qëllimeve mund të jetë jashtëzakonisht i fuqishëm për t’i përafruar mendimet dhe ndjenjat e tua me atë që dëshiron të arrish.
Vendos qëllime të qarta
Pas reflektimit dhe vizualizimit të qëllimeve, është koha për të vendosur qëllime të qarta. Shkruaji ato që dëshiron të manifestosh këtë muaj në terma pozitivë. Për shembull: “Unë po manifestoj financa më të mira dhe jam i/e hapur ndaj mundësive të reja.”
Krijo një plan veprimi
Manifestimi nuk është vetëm të dëshirosh dhe të presësh; ai kërkon veprim. Harto një plan të qartë që përfshin hapat që duhet të ndërmarrësh për të arritur ëndrrat e tua. Pavarësisht nga qëllimet e tua, mund të duhet të kursesh para, të investosh në diçka të re, të krijosh një rrjet kontaktesh, apo të fillosh një punë tjetër.
Përdor pohime pozitive
Përsëritja e pohimeve pozitive forcon besimin dhe përkushtimin tënd. Afirmimet ndihmojnë për të mbajtur një qëndrim pozitiv dhe për t’u përqendruar në qëllimet e tua. Këtu janë disa afirmime që mund t’i përdorësh:
“Unë jam i/e denjë për pasuri dhe begati.”
“Paratë më vijnë me lehtësi.”
“Unë tërheq veç të mira në jetën time.”
“Jam i/e hapur për të pranuar gjithë të mirat që universi ka për të ofruar.”
Përsëriti këto afirmime çdo ditë, sidomos në fillim të muajit, për të mbajtur qëllimet të freskëta në mendje. Kështu, përmes reflektimit, vendosjes së qëllimeve dhe veprimeve konkrete, mund të ndërmarrësh hapat e parë drejt një jete plot pasuri dhe liri financiare./E.Ç
