Italia i shpalli luftë Shteteve të Bashkuara në përgjigje të shpalljes së luftës së kësaj të fundit ndaj Perandorisë së Japonisë, pas sulmit në Pearl Harbor katër ditë më parë. Gjermania e Adolf Hitlerit gjithashtu i shpalli luftë SHBA-së në të njëjtën ditë.
SHBA u përgjigj menjëherë duke i shpallur luftë Gjermanisë dhe Italisë, duke i shtyrë kështu Shtetet e Bashkuara në luftimin e dy fronteve kryesore përtej Oqeanit Paqësor dhe Atlantik në Luftën e Dytë Botërore.
Po ashtu në këtë ditë, Polonia i shpalli luftë Perandorisë së Japonisë.
Më 7 dhjetor 1941, 353 avionë të Perandorisë së Japonisë sulmuan bazën detare të SHBA-së në Pearl Harbor dhe shkaktuan shkatërrim në masë të jetës dhe pronës amerikane, duke filluar një luftë midis Japonisë dhe Shteteve të Bashkuara.
Tre ditë më vonë, diktatori italian, Benito Mussolini, bëri deklaratën e tij nga ballkoni mbi Piazza Venezia në Romë – duke u zotuar se “fuqitë e paktit të çelikut” ishin të vendosur për të fituar.
Pastaj, Adolf Hitleri bëri njoftimin e tij duke thënë se ai ishte përpjekur të shmangte konfliktin e drejtpërdrejtë me SHBA-në, por, sipas Paktit Trepalësh të nënshkruar më 27 shtator 1940, Gjermania ishte e detyruar të bashkohej me Italinë për të mbrojtur aleatin e saj, Japoninë.
Hitleri deklaroi: “Pasi të jetë arritur fitorja, Gjermania, Italia dhe Japonia do të vazhdojnë në bashkëpunimin më të ngushtë me synimin për të vendosur një rend të ri dhe të drejtë”.
Kalendar
11 dhjetor 1843 – U lind në Gjermani mjeku dhe mikrobiologu Robert Koch, i cili u bë i famshëm për hulumtimet e tij mbi tuberkulozin dhe kolerën. Koch u vlerësua me Çmimin Nobel për Fiziologji dhe Mjekësi në vitin 1905, me motivacionin për zbulimet e tij në lidhje me tuberkulozin.
11 dhjetor 1936 – Mbreti Edward VIII i Anglisë u tërhoq nga froni për të vazhduar lidhjen e tij me amerikanen Wallis Simpson. Vetëm 3 muaj përpara këtij vendimi drastik, Edwardi VIII, i cili shënoi një risi në historinë e monarkisë britanike, pati vizituar Turqinë si mysafir i Presidentit Mustafa Kemal Ataturk.
11 dhjetor 1978 – Qytetet e Iranit u bënë skenë e demonstratave masive kundër regjimit të shahut. Gjatë protestave në Isfahan, të cilat u shndërruan në përleshje pas ndërhyrjes së ashpër të forcave të sigurisë, humbën jetën 40 persona.
11 dhjetor 1994 – Ushtria e Rusisë u mobilizua kundër vendimit të njëanshëm të Çeçenisë për shpalljen e pavarësisë. Rusët filluan pushtimin e qyteteve të kësaj republike me mbështetjen e qindra tankeve, por çeçenët i ndalën forcat ruse me luftë guerile. Lufta e Parë Ruso-Çeçene përfundoi me nënshkrimin e Marrëveshjes së Kasavjurtit më 30 gusht 1996.
11 dhjetor 1998 – Thai Airways, Airbus A310-200 u rrëzua afër aeroportit Surat Thani Airport dhe la 101 të vdekur.
