Zgjedhjet në Shqipëri priten të mbahen më 11 maj të vitit 2025, pas dekretimit të presidentit të Republikës, Bajram Begaj. Lidhur me këtë vendim dhe zhvillimet e rëndësishme që pritet të pasojnë gjatë 5 muajve të ardhshëm, ka folur këtë të mërkurë ambasadori i OSBE-së, Michel Tarran.
Teksa u përqëndrua kryesisht në lirinë thelbësore të zgjedhjeve dhe në vazhdën e përpjekjeve për të siguruar një proces të rregullt dhe transparent, Tarran vuri në dukje sfidat me të cilat përballet sistemi zgjedhor në Shqipëri, duke theksuar se ruajtja e fshehtësisë së votimit ka sfidat e saj.
‘Fshehtësia e votimit, ky parim përbën një nga angazhimet kyçe të shteteve pjesëmarrëse të OSBE sipas dokumentit të Kopenhagen. Nga rëndësia që çdo qytetar të shprehë lirisht zgjedhjen e tij pa frikë nga shtrëngimi apo hakmarrja, mbetet thelbësor për integritetin e zgjedhjeve dhe ligjshmërinë e institucioneve që dalin prej tyre. Fshehtësia e votimit, konsiderohet një nga aspektet e rëndësishme të lirisë së zgjedhësve se siguron mbrojtjen e tyre nga presionet që mund të përballen nëse të tjerët mësojnë si kanë votuar. Fshehtësia duhet zbatuar për gjithë procedurën, kryesisht për hedhjen dhe numërimin e votave. Trajtimi i mënyrave për eliminimin e kontrollit të votuesve. Presioni i dekurajon zgjedhësit të ushtrojnë të drejtën e tyre për të votuar lirisht dhe pa frikë”, deklaroi ambasadori në fjalën e tij.
Tarran vijoi më tej duke nënvizuar se procesi demokratik minohet për shkak të krijimit të një mjedisi aspak miqësor për votuesit.
“Përvojat e fundit dhe raportet e OSBE/ODIHR kanë treguar se ruajtja e fshehtësisë së votimit në Shqipëri përballet me sfida. Raportet vënë në dukje se proceset ndikohen negativisht nga problemet teknike dhe procedurale për votimet në grup, tensionet, presionet ndaj zgjedhësve brenda dhe jashtë QV”, shtoi ai.
