Kreu i LZHK-së, Dashamir Shehi dhe drejtuesi i “Djathtas 1912” Enkelejd Alibeaj, nënshkruan dje marrëveshjen e bashkëpunimit në zgjedhjet e ardhshme Parlamentare. Katër muaj para zgjedhjeve ata kanë shtruar në tryezë mundësinë e hapjes një fronti të tretë në një përballje me dy forcat kryesore, PS dhe PD.
Ndërsa na ndajnë vetëm katër muaj nga mbajtja e zgjedhjeve parlamentare, politika shqiptare po hyn në një fazë të re dinamike me shpalljen e koalicioneve të para parazgjedhore. Krijimi i koalicioneve të reja në këtë moment duket se nuk i shkojnë në llogari elektrorale të djathtës, veçanërisht PD e cila sheh që disa subjekte politike tradicionale, por edhe forca të reja janë shkëputur nga boshti I Partisë Demokratike. Këtë të premte u prezantua një platformë e re politike, që tenton të ofrojë një alternativë për votuesit e lodhur nga polarizimi mes dy partive kryesore të vendit, Partisë Socialiste dhe Partisë Demokratike. Në një konferencë për mediat, kreu i Lëvizjes për Zhvillim Kombëtar (LZHK), Dashamir Shehi, dhe drejtuesi i grupimit “Djathtas 1912”, Enkelejd Alibeaj, njoftuan formimin e një koalicioni parazgjedhor që synon krijimin e një fronti të tretë politik. Ky bashkim synon të sfidojë dominimin e dy poleve tradicionale politike dhe të adresojë atë që ata e quajnë një “sistem të mbyllur dhe të korruptuar” që favorizon qeverisjen autoritare. Duke folur para gazetarëve, Shehi theksoi se situata aktuale kërkon një reagim të qartë dhe të bashkuar nga të gjithë ata që mbështesin vlerat e demokracisë dhe transparencës. Ai theksoi se koalicioni synon të përfshijë të gjitha forcat politike dhe shoqërore që janë në favor të hapjes së listave zgjedhore dhe ndërtimit të një sistemi më të drejtë dhe më të përgjegjshëm. “Grupimet kryesore politike kanë mbyllur listat zgjedhore dhe kanë konsoliduar një sistem që favorizon qeverisjen autoritare. Në këto kushte, është thelbësore një përgjigje e përbashkët dhe e vendosur. Ky koalicion është një ftesë për të gjithë ata që ndajnë vlerat e demokracisë dhe kërkojnë një ndryshim të vërtetë,” tha Shehi. Sipas tij, sistemi aktual zgjedhor jo vetëm që pengon konkurrencën e lirë, por gjithashtu forcon një elitë politike që është gjithnjë e më larg interesave të qytetarëve. Shehi nënvizoi se koalicioni i propozuar synon të sfidojë këtë status quo dhe të ofrojë një alternativë që është më e hapur dhe më përfaqësuese për qytetarët shqiptarë. Ndërkohë, Enkelejd Alibeaj e përshkroi këtë nismë si një përpjekje për të krijuar një opozitë të vërtetë dhe të pakompromis. Ai deklaroi se koalicioni do të mbajë një qëndrim të qartë kundër qeverisë aktuale dhe çdo partie apo grupimi politik që bashkëpunon me të. “Koalicioni ynë është një opozitë e qartë dhe e vendosur kundër shumicës qeverisëse. Të gjitha partitë e përfshira në këtë koalicion angazhohen që, përpara, gjatë dhe pas fushatës zgjedhore, të mos kenë asnjë formë bashkëpunimi me partitë që mbështesin qeverinë aktuale. Ky është një parim thelbësor që garanton integritetin e nismës sonë,” deklaroi Alibeaj. Ai shtoi gjithashtu se anëtarët e koalicionit kanë rënë dakord që, pavarësisht rezultatit zgjedhor, asnjë prej tyre nuk do të bëhet pjesë e ndonjë shumice qeverisëse që përfshin Partinë Socialiste ose aleatët e saj. Sipas Alibeajt, ky angazhim garanton që koalicioni të mbetet një alternativë e pastër dhe e besueshme për votuesit. Platforma parazgjedhore e prezantuar nga Shehi dhe Alibeaj përfshin gjithashtu një ftesë të hapur për forcat e tjera opozitare dhe qytetarët që ndajnë të njëjtat vlera. Ata theksuan se procesi i ndërtimit të këtij fronti të tretë do të jetë gjithëpërfshirës dhe i hapur, duke synuar përfshirjen e sa më shumë aktorëve politikë dhe shoqërorë. “Ky nuk është vetëm një koalicion politik, por një platformë për bashkëpunim dhe angazhim qytetar. Qytetarët duhet të ndihen të përfaqësuar dhe të angazhohen në mënyrë të barabartë në këtë proces. Vetëm kështu mund të ndërtojmë një alternativë të fortë dhe të besueshme,” theksoi Shehi.
