Nën rrogoz flitet se Berisha i ka dhënë fjalën Metës se do të fusë atë dhe ndonjë emër tjetër nga PL, në vende të sigurta në zonën e Tiranës…
Fati politik i Ilir Metës (por edhe i partisë së tij) këtë herë do të jetë në dorë të Sali Berishës.
Në zgjedhjet vendore të 2023, ishte Ilir Meta ai që e shpëtoi Sali Berishën. Ky i fundit nuk kishte as logo dhe as vulë partie dhe u fut në zgjedhje nën ombrellën e Partisë së Lirisë. Meta ja ofroi këtë mundësi dhe si këmbim mori shumicën e këshillave bashkiakë.
Mirëpo këtë herë duket se situata ka ndryshuar dhe është Ilir Meta ai që ja ka nevojën Sali Berishës. Me arrestimin e tij, PL ka prekur fundin dhe sipas sondazheve, në zgjedhje kjo parti mund të dalë me “këpucë të kuqe”.
Por në lojë pritet të futet Sali Berisha, duke shërbyer si një lloj kamerdare shpëtimi për Metën. Të paktën kështu flitet në prapaskenë.
Sipas informacioneve, PD ka nisur negociatat me aleatët e saj lidhur me mënyrën e futjes në zgjedhjet e 11 majit.
Duke qenë se nuk lejohen koalicionet para zgjedhjeve dhe formula i penalizon partitë që hyjnë të ndara, Berisha po tenton që e djathta të hyjë me një listë të vetme në zgjedhje. Pra kjo do të thotë, se disa aleatë do të duhet të futen në listat e PD.
Nën rrogoz flitet se Berisha i ka dhënë fjalën Metës se do ta fusë atë dhe ndonjë emër tjetër nga PL, në vende të sigurta në zonën e Tiranës.
Disa muaj më parë, para se të arrestohej, pati një takim mes Metës dhe Flamur Nokës dhe u fol për 10 deputetë të PL në zona të sigurta. Por tani që Meta është në qeli situata ka ndryshuar dhe Meta do kënaqet me pak.
Edhe pse ai është në burg, ka të drejtën e kandidimit, ndonëse nëse merr mandatin do të hapet një precedent i ri, ai i betimit si deputet. I takon drejtësi të vendosë nëse do ta lejojë të betohet apo jo.
Sido që të jetë, Meta kërkon të mbajë gjallë partinë e tij, e cila mund ta themi se është shpartalluar dhe tani shpresa e vetme e tij është Berisha. / S,M
