Elon Musk shkaktoi reagime të forta në Gjermani duke shprehur publikisht mbështetjen e tij për partinë e ekstremit të djathtë Alternativa për Gjermaninë (AfD). Në postimin e tij ai tha: “Vetëm AfD mund ta shpëtojë Gjermaninë”.
Kjo lëvizje ka shkaktuar reagime nga politikanët dhe mediat. Kancelari Olaf Scholz u përgjigj me gjakftohtësi, duke deklaruar se demokracia gjermane është e fortë dhe nuk ndikohet nga pikëpamjet e një miliarderi.
Musk argumentoi se AfD nuk është një parti e ekstremit të djathtë, duke përmendur si argument se liderja e saj, Alice Weidel, ka një marrëdhënie homoseksuale me një grua nga Sri Lanka.
Përfshirja e Musk në debatin politik gjerman përkon me sfidat me të cilat përballet Tesla në Gjermani. Fabrika e kompanisë në Greenheide, pranë Berlinit, është përfshirë në polemika mbi furnizimin e saj me ujë. Ofruesi lokal i ujit, Wasserverband Strausberg-Erkner (WSE), shprehu shqetësime për kërkesat në rritje të Teslës, duke çuar në tensione midis dy palëve.
Për më tepër, zgjerimi i uzinës ka shkaktuar reagime nga grupet mjedisore, të cilët janë të shqetësuar për ndikimin në mjedis, veçanërisht në lidhje me shpyllëzimin. Këto shqetësime kanë çuar në protesta dhe përplasje me autoritetet. Mbështetja e Musk për AfD dhe sfidat me të cilat përballet Tesla në Gjermani kanë krijuar një peizazh të komplikuar për kompaninë./E.T
