Balla për Telebari: Shqipëria, oferta të mëdha turistike për italianët. Këtë verë shpresojmë të mos vijnë vetëm me traget, por me avion Bari-Vlorë
Drejtuesi Politik i Partisë Socialiste për Diasporën, Taulant Balla ndodhet në Itali ku u takua me shqiptarët e Barit për t’u shpjeguar procesin e regjistrimit dhe votimit historik dhe ofertën elektorale politiko-ekonomike të maxhorancës.
Balla dha një intervistë për televizionin italian të Puglia-s, Telebari, nga ku ju bëri thirrje të gjithë shqiptarëve që jetojnë në këtë rajon që të hyjnë në faqen e KQZ dhe të regjistrohen.
“Ky proces ka nisur regjistrimin, kështu që të gjithë patriotët e mi që jetojnë këtu në Puglia, në të gjithë Italinë kanë mundësinë për të marrë pjesë në votimin e 11 majit, nëse hyjnë në sistemin që ka krijuar Komisioni Qendror i Zgjedhjeve: diaspora.kqz.gov.al.
Dhe atje mund të regjistrohen dhe pasi bëhet kjo në adresën që ke krijuar të vjen me postë dhe fleta e votimit. Erdhi momenti dhe jam shumë krenar sepse mbështetëm këtë votim të diasporës prandaj jemi këtu në Bari së bashku me miq dhe kolegë të Partisë Socialiste dhe kryebashkiakë, për të kontaktuar me bashkatdhetarët tanë dhe falë Telebari mund t’i arrijmë edhe nëpërmjet jush t’i kontaktojmë për këtë proces regjistrimi, sepse nëse nuk merr pjesë tani gjatë këtyre 50 ditëve regjistrimi nuk mund të marrësh pjesë në procesin e votimit,” tha Balla gjatë intervistës për Telebari.
Gazetarja italiane u ndal edhe te turizmi, duke përmendur investimet e mëdha që po bëhen nga qeveria shqiptare. Balla deklaroi në intervistë se vitin e kaluar Shqipëria kapi shifrën e 12 milionë turistëve dhe se më shumë se 1 milionë prej tyre vijnë nga Italia, që mbetet partnerja më e ngushtë e Shqipërisë.
“Por turistët tani vijnë nga e gjithë Europa dhe e gjithë bota. Tirana është bërë një “hub” edhe në aspektin e pasagjerëve që përdorin avionët. Kemi patur më shumë 10 milionë pasagjerë në aeroportin e Tiranës. Këtë vit shpresojmë që në verë të jetë hapur aeroporti i ri i Vlorës, në mënyrë që miqtë tanë nga Puglia mund të vijnë jo vetëm me traget siç kemi bërë 30 vitet e fundit, por mund të vijnë direkt në Vlorë ndoshta me avion nga Bari.”
Balla tha se Shqipëria po punon për të zhvilluar turizmin malor që mund të shfrytëzohet edhe në dimër, por edhe në verë pasi terreni gjeografik shqiptar ofron mundësi unike për të shkuar brenda ditës nga bregdeti në mal.
“Shqipëria të ofron këtë mundësi që nëse tani je në plazh, pas një ore mund të shkosh në male ku mund të shijosh ushqim të mirë, por të shfrytëzosh dhe klimën që është shumë e mirë. Sigurisht që Shqipëria dhe Italia janë partnerë shumë të ngushtë por raportet me rajonin e Puglia-s mbeten të preferuarat ndaj duhet të bëjmë ç’është e mundur që të shfrytëzojmë këtë lidhje direkte me Puglia-n. Sepse siç e kemi thënë shpesh: dera jonë drejt Europës është Italia, por hyrja është këtu në Puglia,” tha Balla.
Gjatë ditës së sotme Balla dhe kryebashkiaku i Vlorës, Ermal Dredha do të takohen me emigrantët shqiptarë në “Teatro Forma” në Bari./K.K
