Ish- kryeministri Sali Berisha ka sfiduar kryeministrin Edi Rama më një debat publik. Ai i ka kërkuar që mos i premtoj shqiptarëve nga makina, por të përballen sëbashku në një studio televizive. Këtë deklaratë Berisha e bëri me rastin e 34 vjetorit të krimit të PD në Lezhë
Nga Lezha, në 34-vjetorin e krijimit të Partisë Demokratike në këtë qytet, lideri historik i PD-së, Sali Berisha, ka bërë një thirrje të drejtpërdrejtë për kryeministrin Edi Rama duke e ftuar në një debat publik për çështjet që shqetësojnë shqiptarët. I njohur për qëndrimet e tij të forta, Berisha kërkoi ballafaqim të hapur, duke ironizuar Ramën dhe mënyrën e tij të komunikimit publik.
“Sa rri e flet me veten në makinë, hajde të dalim shesh të burrave e t’i themi njëri-tjetrit të vërtetat në sy,” deklaroi Berisha gjatë fjalimit të tij. Ai kërkoi që debati të zhvillohet në një format televiziv, ku të adresohen çështje thelbësore si ekonomia, pensionet dhe mirëqenia sociale. Ai e konsideroi këtë si një detyrim demokratik dhe një mundësi për të treguar transparencë përballë qytetarëve.
“Kryeministri duhet të dalë nga hijet dhe të përballet. Një debat publik është mënyra më e mirë për t’i dhënë qytetarëve një pasqyrë të qartë të realitetit dhe të vendimeve që ndikojnë jetën e tyre,” përfundoi Berisha. Sfida është hedhur dhe tashmë mbetet për t’u parë nëse Rama do të pranojë këtë ftesë për përballje publike. Ndërkohë, Partia Demokratike duket se po përgatitet për një betejë të fortë elektorale, me synimin për t’u rikthyer në pushtet dhe për të rifituar besimin e shqiptarëve.
Pensionet
Një nga temat e nxehta që Berisha kërkon të shtrohet në këtë debat është niveli i ulët i pensioneve në Shqipëri, krahasuar me vendet fqinje. Duke bërë një krahasim të drejtpërdrejtë, ai theksoi se pensionet në Mal të Zi dhe Maqedoninë e Veriut janë shumë më të larta, edhe pse këto vende nuk kanë burime apo avantazhe më të mëdha ekonomike se Shqipëria. “Hajde shpjegoju pensionistëve pse pensioni në Mal të Zi, që në 2013 ishte më i ulët se këtu, sot është 450 euro. Pse në Maqedoni është 280% më i lartë se në Shqipëri? Çfarë ka Mali i Zi që ne nuk kemi? Pse pensionistët shqiptarë janë trajtuar kaq keq?” – pyeti Berisha, duke sfiduar Ramën të japë përgjigje për këtë krizë ekonomike.
Përçarja e opozitës?
Në fjalimin e tij, Berisha rikujtoi përpjekjet e shumta të mazhorancës për të përçarë opozitën dhe për të dobësuar Partinë Demokratike. Ai akuzoi Ramën se ka përdorur metoda mafioze dhe mbështetjen e interesave të jashtme për të goditur opozitën, duke përmendur ndërhyrjet e Xhorxh Sorosit si një nga faktorët kryesorë. “Ne kemi kaluar një kalvar të gjatë dhe të pamerituar.
Kurrë nuk meritonim të sulmoheshim kaq rëndë, pasi ishim ata që përmbysëm diktaturën më të egër në Europë. Ne e anëtarësuam Shqipërinë në NATO, dyfishuam pagat dhe pensionet, e transformuam vendin. Por u sulmuam nga sundimi mafioz i Edi Ramës dhe nga kryemafiozi i planetit, Xhorxh Sorosi,” deklaroi Berisha. Lideri demokrat ishte i bindur se përgjigjen më të fortë, Rama dhe qeveria e tij do ta marrin nga vota e qytetarëve në zgjedhjet parlamentare të 11 majit.
Ai vlerësoi rikthimin e forcës dhe bashkimit brenda Partisë Demokratike, duke theksuar se pavarësisht pengesave të shumta, PD-ja është sot më e fortë dhe më e bashkuar se kurrë më parë. “Na përçanë, por ne u bashkuam. Na morën flamurin, por ja ku e kemi sërish, më krenar se kurrë. Na arrestuan, por ja ku jemi, më të fortë se asnjëherë.
Ata që kishin parashikuar zhdukjen tonë, do të marrin disfatën e merituar më 11 maj,” tha Berisha. Në mbyllje të fjalimit, Berisha e bëri edhe një herë të qartë kërkesën për një debat publik me Ramën.
