Në Abu Dhabi, Shqipëria, Italia dhe Emiratet e Bashkuara Arabe janë bërë bashkë për të nënshkruar një marrëveshje trilaterale që synon krijimin e një infrastrukture energjetike të qëndrueshme dhe inovative. Projekti, i cili do të realizohet në tre vitet e ardhshme, përfshin ndërtimin e një lidhjeje nënujore për transportin e energjisë elektrike midis Shqipërisë dhe Italisë, duke e pozicionuar rajonin si një nyjë kyçe të tranzicionit energjetik.
Infrastruktura do të lidhë portin e Vlorës me Pulian në Itali dhe do të mundësojë eksportin e energjisë së gjelbër, të prodhuar në Shqipëri përmes burimeve si panelet diellore dhe energjia e erës. Prodhimi dhe transporti i kësaj energjie do të realizohet nga operatorë të mirënjohur ndërkombëtarë si Terna dhe Kompania Kombëtare e Energjisë e Emirateve. Në fjalën e saj gjatë Samitit Botëror të Energjisë së së Ardhmes, kryeministrja italiane Giorgia Meloni shprehu mbështetjen dhe entuziazmin për këtë projekt.
“Ky është një hap historik në diplomacinë energjetike që lidh Europën me Ballkanin dhe më gjerë. Kjo marrëveshje tregon fuqinë e bashkëpunimit midis qeverive dhe sektorit privat për të ndërtuar një të ardhme energjetike të qëndrueshme dhe konkurruese,” u shpreh Meloni. Projekti përkon me një iniciativë më të gjerë të Italisë për të zgjeruar lidhjet energjetike me Ballkanin Perëndimor, duke përfshirë edhe lidhjet ekzistuese si kablloja energjetike mes Malit të Zi dhe Italisë. Meloni theksoi rëndësinë e këtij bashkëpunimi të ri për të përforcuar kapacitetet energjetike të rajonit dhe për të promovuar projekte që nxisin inovacionin dhe qëndrueshmërinë.
Nga ana tjetër, kryeministri Edi Rama e konsideroi këtë marrëveshje si një nga më të rëndësishmet për Shqipërinë, duke e cilësuar si një hap të madh përpara drejt shfrytëzimit të burimeve të rinovueshme dhe përmirësimit të infrastrukturës energjetike. “Shqipëria po transformohet në një furnizues strategjik të energjisë për rajonin dhe përtej tij.
Ky projekt dëshmon se vendi ynë mund të jetë një pikë kyçe në arkitekturën energjetike europiane,” deklaroi Rama. Pjesë e këtij partneriteti janë edhe Emiratet e Bashkuara Arabe, të cilat do të ofrojnë teknologji të avancuar dhe financime për realizimin e projektit. Presidenti i Emirateve, Sheikh Mohammed bin Zayed, u shpreh se kjo marrëveshje është një shembull i qartë i bashkëpunimit ndërkombëtar për një të ardhme më të pastër dhe më të qëndrueshme energjetike.
Mediat italiane dhe ndërkombëtare i kanë kushtuar vëmendje të veçantë kësaj nisme, duke e quajtur një projekt ambicioz që mund të sjellë përfitime të mëdha për të gjitha palët e përfshira. Ndërsa Shqipëria përfiton nga zhvillimi i kapaciteteve të saj prodhuese, Italia siguron energji të pastër dhe të qëndrueshme, duke ulur varësinë nga burimet tradicionale.
Në fund të fjalës së saj, Giorgia Meloni bëri thirrje për guxim dhe vizion në përballjen me transformimet globale. “Ne mund t’i shohim ndryshimet si sfida ose si mundësi. Unë zgjedh të dytën,” theksoi ajo, duke ftuar liderët e tjerë të ndjekin shembullin e këtij bashkëpunimi ndërkufitar.
Ky projekt shënon një fillim të ri për partneritetin mes Shqipërisë dhe Italisë, duke ndërtuar ura të reja energjetike për një të ardhme më të gjelbër dhe më të sigurt për rajonin dhe Europën.
