Dy gjyqtarë të lartë të Gjykatës së Lartë iraniane u qëlluan për vdekje në Teheran të shtunën, raporton Reuters. I plagosur mbeti truproja e njërit prej gjyqtarëve ndërsa autori vrau më pas veten.
Gjyqësia i identifikoi gjyqtarët që u vranë si klerikë myslimanë shiitë të rangut të mesëm, Mohammad Moghiseh dhe Ali Razini. Nuk dihet ende motivi, por zëdhënësi i gjyqësorit Asghar Jahangir tha se dy gjyqtarët ishin përfshirë në “raste të sigurisë kombëtare, duke përfshirë spiunazhin dhe terrorizmin”.
“Në vitin e kaluar, gjyqësori ka ndërmarrë përpjekje të gjera për të identifikuar spiunët dhe grupet terroriste, një veprim që ka ndezur zemërim dhe pakënaqësi midis armiqve”, tha ai.
Njëri prej tyre, Razini, i kishte mbijetuar një atentati në janar 1998, pasi një bombë magnetike e ngjitur në automjetin e tij shpërtheu. Në atë kohë, ai shërbente si kreu i gjyqësorit të Teheranit./K.K
