Për herë të parë njësia elitë e forcave të Armatosura të Shqëipërisë ka dy vajza komando, duke shënuar një hap të rëndësishën në përfshirjen e grave në rolet luftarake të ushtrisë shqiptare.
Njëra prej tyre është nëntogere Suada Laçi. Beretën blu e vendosi disa ditë më parë, pasi kaloi kursin e stërvitjes prej 15 javësh.
“Jam shumë e lumtur që mbaj beretën dhe të përfaqësoj denjësisht vendin tim.”, tha Suada në intervistën për ABC News.
Kursin e mundimshëm, 3 mujor ushtarakja e kaloi me sukses, ndonëse e cilëson sfidues, duke mos e ditur se çfarë e priste.
“Tema alpinizmi, topografie, taktike, pjesa e zjarrit që ka të bëjë me armatimin, për qitjen.”
Por cila ka qenë pjesa më e vështirë?
“Besoj që ka qene pjesa e mbijetesës, duhet te jetonim në kushte ekstreme. Stërvitja ka qenë në një terren të vështirë, me kushte të vështira atmosferike dhe duhet të krijojë mundesitë që te jetojë në ato kushte.”
Nga 38 kursantë, vetëm 24 pre tyre arritën të finalizojnë kursin e komandos. Nëntogere Suada Laci rrëfen emocionet e të qenurit vajzë, me kushte të barabarta në stërvitjet mes efektivëve burra.
“Kanë qenë shumë bashkëpunues, nuk na kanë bërë të ndihemi për asnjë moment keq, apo të ndihemi ndryshe, kanë qenë shumë përkrahës.”
Tetë vite në parë, pasi përfundoi studimet për financë, 27 vjeçarja nisi rrugëtimin drejt forcave të Armatosura, si një dëshirë e ushqyer që nga fëmijëria.
“Gjithmonë më kanë tërhequr ushtarakët në uniforme, duke u rritur kuptova çfarë profesioni fisnik është të qënurit ushtarak. Dhe mendova pse të mos bëhem dhe unë pjese e FA të jap kontributin tim për atdheun tim.”, tha 27 vjeçarja.
Batalioni Komando, një nga njësitë elitare të Forcave Tokësore Shqiptare ka për detyrë operacione speciale në kohë lufte, dhe kryesisht kundër terrorizmit në kohë paqeje.
Vitet e fundit gratë kanë marrë pjesë në misione ndërkombëtare dhe kanë mbajtur pozicione drejtuese në Forcat e Armatosura të Shqipërisë. Nëntogere Suada Laçi ka thyer tashmë tabutë dhe ka këtë mesazh për të gjitha gratë dhe vajzat që ëndërrojnë karrierën ushtarake.
“Të jenë kërkuese ndaj vetes dhe të mos kënaqen më pak.”/e.t
