Presidenti amerikan Donald Trump njoftoi se ai ka urdhëruar Departamentin e Thesarit të ndalojë prodhimin e monedhave të reja 1 cent, duke përmendur rritjen e kostove të prodhimit.
“Për një kohë të gjatë Shtetet e Bashkuara kanë prodhuar monedha 1 cent që na kushtojnë fjalë për fjalë mbi 2 cent. Kjo është kaq e kotë!”, shkroi Trump në një postim të dielën mbrëma në platformën e tij “Truth Social”. “Kam udhëzuar Sekretarin e Thesarit të SHBA-së që të ndalojë prodhimin e tyre”.
Kjo lëvizje e Trump është pjesë e një sërë veprimesh të administratës së tij të re për të zbatuar ndryshime rrënjësore përmes urdhrave ekzekutivë dhe shpalljeve në fusha të ndryshme, nga politikat e imigracionit dhe gjinisë dhe diversitetit deri tek riemërtimi i Gjirit të Meksikës.
Sipas Associated Press, Trump nuk e kishte përmendur gjatë fushatës së tij zgjedhore synimin e tij për të shfuqizuar monedhën një cent.
Megjithatë, “ministria” e Elon Musk që synonte përmirësimin e efikasitetit në qeverinë amerikane propozoi idenë në një postim në X muajin e kaluar, duke theksuar koston e prodhimit të kësaj monedhe të veçantë./kb
